Jakintza, Erasmus Plus proiektuan

Polonia, Grezia eta Turkiako irakasleak D'elikatuzen izan zuten harreran. /
Polonia, Grezia eta Turkiako irakasleak D'elikatuzen izan zuten harreran.

Bi urteko egitasmoa da Polonia, Grezia eta Turkiako hiru ikastetxerekin batera elkarlanean

DV ORDIZIA.

Herrian izan dira Erasmus Plus proiektuan, Jakintza Ikastolarekin batera, elkarlanean ari diren Poloniatik, Greziatik eta Turkiatik etorritako Erasmus Pluseko irakasleak. Europar Batasunak Erasmus plus bekak banatzen ditu Europako ikastetxe desberdinek aurkeztutako proiektuen artean. Aurten, Jakintza Ikastolak beste hiru ikastetxerekin batera proiektu bat aurkeztu zuen eta aukeratua izan da.

Jakintzako zuzendaria den Mikel Etxarriren hitzetan, «gure proiektuaren izena 'Mission Possible: Health' da eta pertsonen osasuna aspektu desberdinetatik aztertzea du xedea. Proiektuak bi urteko iraupena du eta beste hiru ikastetxerekin elkarlanean egingo da». Ikastetxeak, hauek dira: greziar Kreta irlako Kolymvari High School, Turkiako Antalya hiriko Yusuf Ziya Öner Fen Lisesi eta Poloniako Slocieniec herriko Gimnazium nr 1 w Zlociencu.

«Ikastetxe bakoitzak ikuspuntu desberdin batetik aztertuko du osasunaren gaia; turkiarrek espezien aldetik, greziarrek uraren aldetik, poloniarrek basoen aldetik eta euskaldunok nutrizioaren ikuspegitik. Gainera, beka honek bidaiak egiteko eta gure proiektu kideak ezagutzeko aukera emango digu, Polonian, Grezian eta Turkian. Ikasleen komunikazio hizkuntza ingelesa izango da eta, modu honetan, ingelesa hobetzeko aukera paregabea eskaintzen digu eta leku eta pertsona berriak ezagutzekoa. Ilusioz beteta gaude erronka berri honen aurrean eta ahaleginak egingo ditugu esperientzia ahaztezina izan dadin guretzat eta, bereziki, gure ikasleentzat» dio Etxarrik.

Proiektuaren lehen ekintza, parte hartzen duten irakasleen batzarra izan da. Jakintza Ikastolari egokitu zitzaion bi urteko iraupena izango duen proiektu honen txupinazoa jaurtitzea eta proiektuaren xehetasun guztiak hemen finkatu behar zituzten. Horretarako, Greziatik bi irakasle, Poloniatik hiru eta Turkiatik beste hiru Ordiziara etorri ziren. Joan den astearte gauean iritsi eta asteazkenean, D'elikatuz Zentroan, ongi etorri beroa eskaini zieten. Ordiziako Alkatearen hitzak entzun ondoren, opari trukaketa iritsi zen eta, jarraian, Leire Arandiak D'elikatuz museoan gidatu zituen. «Handik ateratakon, azoka ikusteko eta gure gastronomiaz gozatzeko aukera izan zuten. Ikaragarri gustatu zitzaien!»

Sabela berdinduta, lanari ekin zioten eta, ondoren, Ordiziako pin-txo-pote zer zen ezagutzeko aukera ere izan zuten. «Txundituta geratu ziren gure ohitura horrekin eta hotelera bueltatzeko gogo gutxi erakutsi zuten. Baina lan handia zuten aurretik eta ondo deskantsatu beharra zegoen» dio zuzendariak.

«Ondorengo lau egunetan, ikastolako instalazioetan lanean gogor aritu ziren, baina tarte batzuk ere gorde zituzten gure inguruko parajeak ezagutzeko. Goierri, Donostia, Gipuzkoako kostaldea, Gaztelugatxe, Bilbo etabar bisitatu eta, zinez, gure bazter hauekin maiteminduta bueltatu ziren. Ikasleekin bueltatzen direnerako, ikusi gabeko beste irteerak ere prestatuta utzi dituzte. Nekaezinak dira. Astelehenean, Bilboko aireportuan agur- tzean, pilatutako nekea nabaria bazen ere, emozio handiz, esker onez eta maleta oroigarriz beteta ikusi genituen» zion Etxarrik.

Proiektuaren bigarren fasea Ordiziara 2019ko otsailean iritsiko da berriro. Baina orduan hiru lurralde horietako irakasleaz gain, ikasle koadrila handi bat ere hemen izango da. Euren irakasleek bizi izan dutenaren berri baldin badute, etortzeko irrikan egongo dira, zalantzarik gabe.

Fotos

Vídeos