Idiazabal gaztaren denboraldi berria aurkeztuko dute Ordizian

Iazko gazta gaztea ebaki zutenekoa Luis Irizar, Subijana eta Argiñano tartean zirela/J. M. Lopez
Iazko gazta gaztea ebaki zutenekoa Luis Irizar, Subijana eta Argiñano tartean zirela / J. M. Lopez

Joxe Mari Goenaga zinemagileak egingo du aurtengo gazta-mozketa. Besteak beste, gaztaren erregulartasun-kalitate sariak ere banatuko zaizkie Legazpiko Aitor Mantxola artzainari eta Udabeko (Nafarroa) Dorrea Gaztandegiari

DVDonostia

Ordizian aurtengo azoka berezien egutegiari hasiera emango dion Artzain Eguna egingo dute bihar. Artzainak eta gazta izango dira protagonista. Besteak beste, Idiazabal gaztaren denboraldi berriaren aurkezpen ofiziala egingo da, Joxe Mari Goenaga zinema zuzendari eta gidoilari Ordiziarrak gaztea ebakiko du.

Goizean goiz ekingo diote egunari, Plaza Nagusian eta inguruetan egingo den asteroko azokarekin. Horrez gain, gazta, Goierriko produktu eta Gipuzkoako artisauen saltokiak ere egongo dira.

Aurten, Garagartza plazan, 9:00etan hasita, latxa arrazako 50 bat artzainen aharien erakusketa eta salmenta egingo da. Bertan, 200 abelburu inguru izango dira ikusgai, Euskal Herriko erakusleiho garrantzitsuenetarikoa denean. Bi motako animaliak izango dira erakusketa horretan: latxa mutur-gorriak eta latxa mutur-beltzak.

Mutur-gorrien kasuan Aralar, Ernio, Izarraitz, Gabiria, Azpeitia edo Donostialdeko animaliak izango dira ikusgai. Mutur-beltzetan, berriz, Urbia, Elgoibar, Legazpi, Ordizia, Zerain eta Oñati ingurukoak.

Garagartza Plazan gazta egingo da zuzenean haurrei zuzendutako ekimenean. Mami-dastatzea eta ardien ile-mozketa, makinaz zein eskuz ere egingo dute eguerdi partean.

Transhumantziara buelta

Goizeko 11.00ak aldera, garai batean artaldeak negua bukatzen zenean mendira joateko herri barrutik igarotzen ziren bezala, Ordiziako Herri Zaharretik barrena ibiliko dira 2.000 ardi baino gehiago. Modu honetan antzinatik egin izan den eta denbora berriek zailtzen duten menditik haranerako eta alderantzizko desplazamendua gogoratuz, askok oinez eta errepidetatik egin behar izaten dutena.

Eta artzain gehienak kamioiez Aralar edo Aizkorriko magaletara garraiatzen dituzten arren, badaude oraindik antzinako usadioa mantentzen dutenak, ordutegi zehatz eta ez ohikoetan beraien bidaia osatuz. Maiatzaren lehenengotik aurrera egin ahal izango dute mendiko larreetara buelta.

11:15etan, Ordiziako Udaletxeko Batzar aretoan, Joxe Mari Goenaga zinema zuzendari eta gidoilari Ordiziarrak gazta gaztea ebakiko du. Baina, aldez aurretik, Zacarias Puente, Kantabriako Gazta Kofradiaren sortzaileari omenaldia egingo zaio, Euskal Herritik kanpo Idiazabal Gaztaren difusioan egindako lanagatik.

Bestalde, gaztaren erregulartasun-kalitate sariak banatuko zaizkie Legazpiko Aitor Mantxola artzainari eta Udabeko (Nafarroa) Dorrea Gaztandegiari ere.

Ohitura den moduan, goiz guztian zehar Garagartza Plazan 40 Euskolabel arkume burruntzian prestatuko ditu Karlos Ibarrondok. 11.30etatik aurrera arkume pintxoak salgai jarriko dira. Bildutako dirua ASPANOGIrentzat, Gipuzkoako Haur Minbizidunen Gurasoen Elkartearentzat, izango da.

Azkenik, arratsaldeko 18:00tan Ordiziako D´elikatuz Zentroa eta Urrup Antzerki taldeak elkarlanean, Ordiziako kasko historikoaren bisita gidatu antzeztua eskainiko dute.

Temas

Euskera

Contenido Patrocinado

Fotos

Vídeos