Ia bi milioi euroko aurrekontua izango du Ataungo Udalak 2018rako

Herritarren ekarpenak kontutan hartu dira kontuetan. /  IBARGUTXI
Herritarren ekarpenak kontutan hartu dira kontuetan. / IBARGUTXI

Iazkoekin alderatuz, 400.000 euro egin dute gora aurtengo udal kontuek

DV ATAUN.

Ataungo Udalak jakitera eman duenez, 1.989.711 euroko aurrekontua onartu du 2018 honetarako, udalbatzan Herrigintzak aurkako botoa eman bazuen ere. Iazkoarekin alderatuz, 400.000 euroko igoera izan du aurtengoak.

Udaletik azpimarratu dutenez, aurtengoan ere, azaroan zehar auzoz auzo aurkeztu zituzten aurrekontuak, eta bilera hauetatik, bereziki, herritarren proposamenak entzun eta jaso zituzten. Haien ekarpenekin azken moldaketak egin zituzten eta duela egun batzuk onartu zituzten behin betiko kontuak.

Gastuen atalari dagokionez, 2018an ere kontu sail nagusia Udalaren beraren gastuei dagokiena izango da, 637.600 euro. Gasturik gehienak finkoak dira. 2018an, gainera, igoeraz gain, behin betiko eguneratzea izan duen arloa da, bi arrazoirengatik, Udaletik azpimarratu dutenez: «Azken 16 urteetan eguneratu ez den, eta erabat beharrezkoa zen lanpostuen balorazio eta solda-tzen eguneratzea amaitu dugu. Honela, udal langile guztien soldatzen eguneratzea jasotzen dute azken aurrekontu hauek. Honetaz gain, udal gobernuak langileei hitz emandako eguneratzea, 2017 urteari dagokiona ere izango dute langileek. Bestalde, udal langileen taldean, iaz baino bost langile gehiago aurreikusi dira, lan jardun osorako hiru. Horietako bat, Inazio Munduateren memoria lanak jasotzeko ardura duen historialaria». Honenbestez guztira 14 udal langile eta alkatearen liberazioa aurreikusten dira.

San Martingo plaza ondoan dauden lursailen jabetza eskuratuko du Udalak

Kultur jardueren eta festen kontu sailean aurrekontua hobetu dela nabarmentzen du Udalak eta Gizarte Zerbitzuetako sailak ez duela murrizketarik izango. «Sail honek herrian betetzen duen ezinbesteko funtzioa babesten jarraitzeko konpromisoa berresten da».

Aipatzekoa da, baita ere, San Martingo plaza ondoan dauden lursailen jabetza eskuratuko duela Udalak. Hilabete honetan egin den azken ordainketarekin (75.000 euro), 230.000 euroko konpentsazio ekonomikoa ordaintzea lortu da azken hiru urteetan.

Gastuen atala ixteko, Udalak duen menpekotasunak ere behera egin duela nabarmentzen dute udal arduradunek. 2011n Udalak hainbat kreditu eskatu zituen, guztira 840.000 euroko mailegua. Egun, kreditua 334.744.28 eurokoa da.

Sarreren atalean, 2018ko erronka nagusia gutxieneko inbertsiora begira ezarri du Ataungo Udalak. Iaz baino 114.000 euro inguru gehiagoren beharra izango dutela aurreikusi dute. Inbertsioen atalean sartzen dituzte: baserri bideak, haur parkeak, kale argiteria berritzea, barandillen jarraipena, San Martingo zubiak berritu, San Gregorioko frontoia itxi, San Martin Apalategiren ikus-entzunekoa, I. Berditasun plana, antzokiko sarrera eta identifikazioa berritu, Ubarri etxe aurreko eta Olaldeko urbanizazioak, udaletxeko berogailua, eskolako hainbat obra, herriko informazio panelen berritzea, eta Kaxio ibilbidea berritu eta mantentze lanak.

Beka berria

Bestalde, sinatu eta sustatuko diren hitzarmenen artean, badira berritasunak. Joxe Martin Apaletegi antropologoak utzitako bideari jarraipena emanez. Ataun Aztergai Beka jarriko dute martxan eta 13.000 euroko inbertsioa izango du. Ataun mapan kokatu duen antropologoa gogora ekartzeko, Apalategi beraren familiaren babesarekin egingo den omenaldia eta ikus-entzunezkoa ere egingo dute.

Contenido Patrocinado

Fotos

Vídeos