Lazkao izango da bihar giza katearen abiapuntuetako bat

Kataluniaren aldeko elkarretaratzea./
Kataluniaren aldeko elkarretaratzea.

Gure Esku Dagok Lazkao, Beasain eta Ordizia batuko dituen giza katean parte hartzera deitu ditu bihar goierritarrak

DV LAZKAO.

'Kataluniarekin bat, guk ere erabakiko dugu!' lemapean, bihar, igandea, Lazkao, Beasain eta Ordizia batuko dituen giza katea egingo dute goierritarrek, Gure Esku Dagok deituta. Kataluniarrei elkartasuna adierazteko modua izango da «jakin dezatela bide horretan ez daudela bakarrik, une oro alboan izango gaituztela».

Urriaren 1ean milioika herritarrek euren erabakitzeko eskubidea gauzatu zuten Katalunian eta «trabak traba eta oztopoak oztopo, Kataluniako herriak duintasun irakaspen bat eman zion munduari», nabarmendu du GEDek, «milaka herritar hautesontzien defentsan, milaka herritar demokraziaren defentsan».

Une historiko baten aurrean gaudela azpimarratu du GEDek eta «gu geu izan gaitezkeela protagonista. Gure etorkizuna, gure eskuetan hartzeko unea da».

Horregatik, biharko giza katea, kataluniarrei elkartasuna adierazteko modu bat izateaz gain, aldarrikapenerako toki izango da. GEDen esanetan «guk ere, kataluniarrek bezala, gure etorkizuna aske eta demokratikoki erabaki nahi dugu eta norabide horretan pauso sendoak emateko unea da».

Bi mutur, bi mezu

12:00etatik aurrera gauzatuko da giza katea, Goierriko herri bakoitzari eremu bat izendatu zaiolarik horretarako. Bi beso izango ditu -bat Lazkaon hasi eta Beasainen bukatuz eta Ordizitik Beasainera bitartekoa bestea- eta Beasaingo Loinazko San Martin plazan elkartuko dira biak.

12:20ean, giza katearen bi ertzetatik lekuko bana aterako da, Joxe Bikuña eta Julene Iturrioz, 82 urteko goierritarren eskutik, eta eskuz esku joango dira Beasaingo plazaraino. «Lekukoek aurrera egin ahala, katea desegiten joango da. Horrela, guztiok elkarrekin, lekukoaren atzetik bidea egin eta Beasaingo plazan egingo den ekitaldian elkartuko gara», dio Gure Esku Dagok.

Fotos

Vídeos