Larrunarri pilotalekua erabat itxita egongo da berriztatze lanek dirauten bitartean

GOIKOETXEA AMEZKETA.

Atzo, astelehenarekin eman zitzaien hasiera Amezketako Larrunarri pilotalekua berriztatzeko lanei. Obrek 7-8 aste iraungo dute, hasieran aurreikusita zegoena baino bi aste gutxiago, eta lanek dirauten bitartean pilotalekua erabat ixtea erabaki du Amezketako Udalak. «Obraren zuzendaritzarekin batera hartutako erabakia izan da», azaldu dute Udaletik. «Besteak beste, harmailak eta instalazio elektrikoa berritu behar dira, baita frontoiko paretak margotu ere, eta lanen garapen egokia eta, batez ere, herritarren segurtasuna bermatzeko frontoia guztiz ixtea erabaki dugu».

Hala, Gaztelekuko jarduera Haurtzaindegi zaharrean burutuko da 7-8 aste horietan, eta frontoiko ohiko jarduerak (entrenamendu eta partidak barne) herriko beste pilotalekuetan egin ahal izango dira.

Horrez gain, herriko plazan frontoiaren ondoko eremu ba-tzuk erreserbatu ditu Udalak lanak burutzen ari den enpresako ibilgailuentzako zein material eta hondakinen pilaketarako. Eta, dagoeneko herritar asko ohartuko ziren moduan, «herriko plazan karpa bat jarri dugu, obrek dirauten bitartean herritarrek gutxienez aterpe bat izan dezaten». Horrekin batera, amezketarrei pazientzia eskatu die Udalak, «mereziko baitu datozen bi hilabeteotan eragozpenei aurre egitea, gero pilotaleku berritua izan dezagun».

Larrunarri pilotalekua berriztatzeko lanak Gasteizko Indenort PV SL. enpresak burutuko ditu 314.542,51 euroko aurrekontuarekin.

Contenido Patrocinado

Fotos

Vídeos