Larren eguna antolatu dute hilaren 16an

Leitzako lehen sektoreko kideek paisaian egiten duen ekarpena ezagutarazteko antolatu dute eguna

ELISA BELAUNTZARAN LEITZA.

Bertatik Bertara dinamika osatzen duten talde eta pertsonek (Leitza eta Aresoko Udalak, LeitzEKO Kontsumo taldea, ekoizleak...) Larren eguna antolatu dute hilaren 16rako. Antolatzaileen esanetan «larren egunaren helburu zehatza da, bertako ekoizle eta baserritarrek Leitzako herrian egiten duten ekarpen sozial eta kulturala balorean jartzeaz gain, paisaia eta lurraldearen mantentzean egiten duten lana ezagutarazi eta aitortzea».

Horretarako egun osoko egitaraua antolatu ute. Goizean goiz herritik abiatu eta Telleri baserrian geldialdia eginen da. Bertan ardi eta haziendekin, belatxotan... egiten den lana ezagutzeko aukera izanen da.

Ondoko hitzordua Mukarrainen izanen da. Nahi duenak autoz joan ahalko du bertaraino. Han haziendak larretan ikusteaz batera, mendi batzordeko kideek larreen funtzionamenduaz, eta beste hamaika istorio kontatuko dituzte. Haur zein helduak baserri mundua ezagutzeko moduko eguna izanen da beraz hilaren 16rako antolatutakoa.

Amaitzeko eta egunean jasotakoaz lasai aritzeko bazkaria eginen da Kornietan. Bazkaria, Leitza eta Aresoko ekoizleen produktuekin osatuko da (entsalada ,zikiroa eta gaztanbera) Txartelak Astiz, Maimur, Musunzar eta Torrean egonen dira eta Areson Sastinean. Bazkarirako txartelak, aste honetan jarriko dira salgai (Langileak 22 euro, langabetu eta ikasleak 15 euro eta haurrak 10 euro). Erosteko azken eguna hilak 12,asteartea da.

Aipatzekoa da ekitaldi hau 'Leitza Kontsumituz' partaidetza prozesuaren baitan antolatu zen. Honen helburu nagustietakoa ekintza plan bat osatzeko ekarpenak jasotzeko bildu ziren iazko udazkenean herriko eta inguruko hainbat lagun. Ekarpen horiek, Lehen sektorearen eta bertako produktuen bisibilizazioa, elikadura burujabetzaren ikuspegitik, etorkizunera begirako hausnarketa egitea eta bertako produktuen ekoizpena eta kontsumoa bultzatzea zuten helburu. Bisibilizazio ekimenen barruan, antoaltu dute bihar zortziko hitzordua.

Contenido Patrocinado

Fotos

Vídeos