Hotza protagonista Antton Pebet memorialeko lehen bi jardunaldietan

Erabakita geratu dira lehen final laurdenetan arituko diren bikoteak

I.A. AMASA-VILLABONA.

Hotza izan da nagusi Behar Zana Pilota Taldeak antolatzen duen Antton Pebet memorialeko lehen bi jardunaldietan. Villabonako Bear Zana frontoian pilotariei eskuak eta gorputza berotzea kosta zitzaien. Agian, datorren urtean pilotalekua itxita badago, jarri ahalko da berogailurik. Kanpoko giro hotzak ondorioz eragin handia izan zuen abenduaren 1ean eta 2an jokatutako partidetan. Hala ere, ikusleek ederki erantzun zuten eta armailak duinki bete ziren.

«Ostiralean, lehen norgehiagokan Urbieta asteasuarrak eta Aranguren agiñarrak Peru Labaka zizurkildarra eta Hernaniko Aizpitarte izan zituzten aurkari. Izenez, lau pilotari handi. Labakak, berez, fase buru parte hartu behar bazuen ere, 15ean jokatu ezin zuenez, antolakuntzak abenduaren 1ean jokatzeko eskaria egin zion, Prietok azken unean eskuko minez zenez partida ez jokatzea erabaki baitzuen. Partida honetan bikote bakarra izan zen protagonista: Urbieta eta Aranguren. Aurrean zein atzean guztiz nagusi. Pilota bizi mugitu zuen atzelari gazteak, eta Urbieta erraz moldatu zen defentsan jardun behar izan zuenean; erosoan ere eraginkorrena izan zen. 21-7 galtzen joan ziren eta zizurkildarraren erreakzio bati esker lortu zuten markagailua txukuntzea. Azken emaitza 22-13koa izan zen», diote.

Bigarren partidan ezustekoa gertatu zen. Santxo usurbildarrak eta Behar Zana taldeko Esnaola txaramarrak 10-2 eta 20-10 dominatua zuten partida, baina inork espero ez zuenean, Añorgako Urmenetak eta Asteasuko Urruzolak banaka-banaka tantoak pilatzen joan eta partida berdintzea eta ondoren irabaztea lortu zuten. 22-20 izan zen azken emaitza.

Larunbatean bi bikote izan ziren nagusi. Lehen partidak 20 minutu ez zituen iraun. Hernaniko Arrietak eta Bergarako Zezeagak 22-9 irabazi zuten Berrobiko Zubiria eta Burlatako Eskirozen aurka. Bigarren partida antzekoa izan zen. Markagailua ere ia berdina. 22-8 irabazi zuten Eneko Labaka albizturtarrak eta Mariezkurrena II. nafarrak Espinal eta Aizpururen aurka.

Contenido Patrocinado

Fotos

Vídeos