Hitzordu hirukoitza prestatu du Tobera Musika eskolak Santa Zezilia ospatzeko

Musikarien zaindari Santa Zeziliari gorazarre egiteko hi-tzorduak hiru izango dira aurten Zegamako, Zeraingo, Segurako eta Mutiloako Tobera Musika-eskolaren aldetik.

Hala, hilaren 16an, osteguna, 17.30ean Toberako txistuko eta trikiti, pandero eta perkusioko ikasleen kalejira eta euskal dantzen emanaldia izango dira Zeraingo plazan.

Hilaren 23an, osteguna, arratsaldeko 18:15ean Segurako plazatik Aterpetxerainoko kalejira izango da Tobera Musika-eskolako trikitilarien eskutik. Eta 18:30ean Santa Zeziliaren omenezko kontzertua aterpetxean Tobera Musikaeskolako ikasleen eskutik.

Bertan, besteak beste, helduen talde hasiberri baten estreinako saioa entzuteko aukera izango da eta Iker Zubeldia zegamar bertsolariak berariaz egindako kopla batzuk abestuko dituzte zenbait ikaslek. Gainerakoan, ohi denez zaindariaren omenezko kontzertuan, talde oso txikitan jotzen jarriko dituzte musika-eskolako ikasle gaztetxoak, jendaurreko lanean ohitzen has daitezen.