Haurrek ederki pasa zuten jolasean Alkizan

Mota guztietako mozorroak ikusi ahal izan ziren. Gogoz saiatu ziren jokoetan.
Mota guztietako mozorroak ikusi ahal izan ziren. Gogoz saiatu ziren jokoetan. / NÚÑEZ ARGAZKIAK

NÚÑEZ ALKIZA.

Ohitura den bezala haurrak izan ziren protagonista Alkizako jaien hasieran. Txupinazoaren ondoren, Alkizako plaza haurrez bete zen guraso elkarteak antolatutako jolasetan aritzeko. Koxkolak biltzen, uztaiaren jolasean, bolatxoak biltzen, painuelitoan, eta abar ibili ziren haurrak eta gaztetxoak.

Haurrak jaietarako gogoz zirela erakutsi zuten eta gogoz parte hartu zuten jokoetan. Amaieran, guztientzako txokolate beroa, pastak eta goxokiak banatu ziren.Gainera, mozorro festa ere izan zen atzo arratsaldean. Herritar ugari atera ziren mozorroak jantzita kalera, jaiei hasiera koloretsua emanez.

Gaurko egitaraua

Gaur ostiralean, Meza Nagusia ospatuko da 12:00etan elizan eta ordu berean haurrentzako apar-festa izango da plazan. Ondoren, helduentzako toka izango da eliza aurrean. Jarraian, 14:00etan jubilatuen bazkaria izango da Ostatu jatetxean. Bazkalondoren, 17:00etan herriko gazteek dantza emanaldia eskainiko dute plazan eta ondoren, 18:00etan, sagardo dastaketa eta taloak izango dira. Gaueko 23:00etan bertso-jaialdia izango da frontoian Maialen Lujanbio, Oihana Iguaran, Amets Arzallus, Amaia Agirre, Andoni Egaña eta Sebastian Lizasorekin. Gai jartzailea Haritz Mujika izango da. Egunari amaiera emateko Bide Batez taldearekin dantzaldia egongo da plazan.

Fotos

Vídeos