Hamaika ekintza antolatu dira Lazkaon Gabonetako oporrez herrian gozatzeko

Txikiak kantuan aterako dira bihar goizean, herriko kaleetan zehar gabon giroa zabalduz. /  DV
Txikiak kantuan aterako dira bihar goizean, herriko kaleetan zehar gabon giroa zabalduz. / DV

Bihar ikastolako haurrak ibiliko dira kantari goizean eta, arratsaldean, opariak banatzera datozen Olentzero eta Mari Domingiri harrera egingo diete lazkaotarrek

DV LAZKAO.

2017a agurtzeko egun gutxi batzuk baino falta ez diren honetan, 2018ari ongietorria gustora emateko aitzakiarik etzaie faltako lazkaotarrei. Izan ere, Gabonetako oporrez herrian bertan gozatzeko, mota guztietako ekitaldiak antolatu dira Lazkaon bihartik hasi eta urteparrilaren 7ra arte.

Astelehenean esaterako, Eguberri-egunean, jaiotza biziduna izango da eguerdiko 13.00etatik aurrera Lazkao Txiki zelaian, urtero moduan, baina horren aurretik, bihar, igandea, egun magikoa biziko dute txikienek. Goizean zehar ikastolako irakasleekin ibiliko dira herriko kaleetatik Olentzerori kantatzen eta arratsaldean, ikazkinari eta Maridomingiri ongietorria egingo die. 17.30etan bilduko dira San Prudentzio auzoan menditik datorren bikotearekin eta kriseiluekin herriko kaleetatik gidatuko dituzte plazaraino.

Kirolarentzat tartea

Datorren astean, Gabonetako lehen ospakizunak pasata, kirolari tarte bat ere egingo zaio Lazkaon. Batetik, abenduaren 29an Ordizian lehiatuko den Nazioarteko Igeriketa Txapelketako entrenamenduak egingo dituzte igerilariek Joxemiel Barandiaran udal kiroldegiko igerilekuan, 27an (9.00-11.00 eta 16.30-18.30) eta 28an (9.00-11.00), eta bestetik urtea korrika eginez agurtuko dute lazkaotarrek 31an.

San Silbestre lasterketa herrikoiaren seigarren edizioa antolatu dute Antzar korrikaliek, urteko azken egunerako. Goizeko 12.00etatik aurrera San Silbestre Txikia ospatuko da lehenengo, haurrek ere parte hartu dezaten, eta 13.00etan helduen lasterketa hasiko da, bost kilometroko ibilbidea duena. Helduen proban parte hartzeko (14 urtetik gorakoek) aurrez eman behar da izena www.sailkapenak.com web orrialdean. Doakoa izango da abenduaren 29a arte (hau barne) baina azken egunean hamar euro kostako da.

Bestalde, abenduaren 27tik 30eran izotz pista jarriko da plazako pilotalekuan. Izotz gainean doan irristatzeko aukera egongo da egunero, goizeko 11:00etatik 13:30era eta 16:30etik 20:30era.

Ospakizun gehiago

2018a iritsita, zine emanaldi bereziak izango dira Arerian haurrentzat. Urtarrilaren 3an, asteazkena, Richard zikoina ikusteko aukera izango da, 17.00etan, eta 4ean, osteguna, Igelen Erresuma, ordu berdinean. Sarrera euro bat kostako da bietan.

Kantaka abesbatzak ere gabonetako kontzertua urtarrilean eskeiniko du oraingoan, 3an. San Prudentzio ermitan izango da, 19.00etan, eta lazkaotar guztiak daude gonbidatuta saiora.

Azkenik, urtarrileko lehen astean, errege magoen txanda izango da baita ere eta urtero errege egunaren ondorengo lehen igandean ospatzen den Astotxo Egun ezagunarena. Errege magoak urtarrilaren 5ean iritxiko dira Lazkaora, ostiralarekin; Txindoki egoitzara joango dira lehenengo, goizean, eta herriko kaleetatik pasako dira arratsaldean, 18:30etik aurrera.

Astotxo Egunari daokionean, urtarrilaren 7an ospatuko da aurtengoan, Gabonetako ospakizunei amaiera emateko. 10:00etan herrian zehar izango den asto dianarekin hasiko da festa; 11:00etan meza nagusia izango da, Lazkaoko abesbatzaren partaidetzarekin, Zistertarren konbentuan eta 12:00etan Gipuzkoako XIX. enkarterri asto lehiaketa plazan. Azkenik, 13:00etan Maria, Jose eta Jesus haurreren Egiptorako ihesa antzeztuko dute kalean Zawopikoek, Infantadoko jauregi, Monja Zistertar eta Lazkao Txiki Zelai iguruetan.

Goiz guztian zehar asto-gurdi ibiltariak, salda beroa, trikitilariak, txistulariak etab. izango dira plazan eta Zistertarren komentuan, Egiptorako ihesaren aintzinako irudiak ikusgai eta olata salmenta.

Contenido Patrocinado

Fotos

Vídeos