Gipuzkoako Nekazaritza Ekologikoaren XXIII. azoka egingo da bihar

Eskaintza zabala izan ohi da urtero Nekazaritza Ekologikoaren azokan.
Eskaintza zabala izan ohi da urtero Nekazaritza Ekologikoaren azokan. / MUÑOA

ION MUÑOA ZERAIN.

Produktu ekologikoen plaza handia bihurtuko da beste behin ere Zeraingo herria. Bihar, iraileko hirugarren igandean, jada tradizio luzea duen Gipuzkoako Nekazaritza Ekologikoaren XXIII. azoka egingo da. Goizeko 10etatik 14etara bitartean, 23 ekoizle egongo dira arau ekologikoak jarraituz ekoitzitako produktu ezberdinak saltzen. Barazkiak, frutak, edariak, gozoak, txerrikiak, ogiak, gaztak, haragiak, pasta, olioa, oihalak, etab. erosi ahalko dituzte azokara gerturatzen direnek. Kalitatea, osasuna eta bizimodu jasangarria uztartzeko ezinbesteko hitzordua biharkoa Zerainen.

Azokako salmenta postuez gain, hainbat artisau, umeentzako gozogintza tailerra, erakusketak eta beste hainbat egiteko ere izango dira, ohi bezala. Azokan erositako produktuekin prestatutako pintxoak jateko aukera ere izango da. Azken batez, ekoizpen ekologikora gerturatu, punta puntako produktu onak erosi eta goiz pasa ederra egin nahi duenak Zerainen aukera paregabea izango du bihar.

Asteazkenean hitzaldia

Goierriko bizitza eta nekazaritza ekologikoaren X. hamabostaldiaren baitan Goierriko hainbat herritan antolatu diren hitzaldi eta ekitaldien artean, Zerainen irailaren 20an, asteazkena, hitzaldi bat izango dugu. Hain zuzen ere, “Agricultura consciente: suelo vivo y biodiversidad vegetal para prevenir y curar plagas y enfermedades” izeneko hitzaldia eskainiko du Clara Gutierrez-ek, gaztelaniaz, iluntzeko 7etan kultur etxean.

Fotos

Vídeos