Gaurkoan odolkia izango da protagonista

Denetarik ikusteko aukera izan zen, besteak beste, txu-txu trenean Benidormetik iritsitako turistak, bikingoak, piratak eta beste asko./
Denetarik ikusteko aukera izan zen, besteak beste, txu-txu trenean Benidormetik iritsitako turistak, bikingoak, piratak eta beste asko.

DV ORMAIZTEGI

. Ostiral arratsaldean eta atzo goizean elurra mara-mara ari zuela gauzatu ziren herriko jai nagusien egitarauaren baitan antolatutako ekintzak. Aurtengoan Ander Deunak elurra oinetara ekarri digu, esaera zaharrak diona gauzatuz. Eguraldi kaxkarra eta negu giroa nagusitu arren, hotzari aurre eginez mozorroturiko lagun taldeek girotu zituzten herriko kaleak, eguerdira bitartean Jundajo txarangaren doinuekin eta arratsaldean elektropatxarangaren doinuak jarraituz.

Zezentxo eta ponietan ibiltzeko aukera izan zuten gaztetxoek. Ekotaloak dastatu eta gauean Ilargi beltza taldearekin dantzaldia eta Tekno gauarekin amaitu ziren eguneko ekintzak.

Gaurko egitaraua

10:00etatik 14:00etara haurrentzako parkea, Zubipe kiroldegian. 11:00etatik 14:00etara Ormaiztegiko odolkia izango da protagonista, ondorengo ekintzak gauzatuko direlarik herriko enparantzan. Ormaiztegiko XXXI. Odolki Lehiaketa, XX. Odolki Osagaien Azoka eta Lehiaketa eta Ormaiztegiko odolkia osagaitzat duten plateren XVI Sukaldaritza Lehiaketa (Juan Jose Lapitzi omenaldia).

Jarraian odolkia dastatzeko aukera izango da Baso-Txulo elkartearen laguntzarekin. Goiz guztian zehar artisau produktu gastronomikoen azoka izango da. Aurtengo urteko herriko Ander Deunaren jaiei amaiera emanez 19:00etan Pauline&Juliette bikotearen kontzertua izango da.

Contenido Patrocinado

Fotos

Vídeos