Ederki pasa zuten haurrek euren egunean

Bederatzi pintxo aurkeztu ziren lehiaketara.
Bederatzi pintxo aurkeztu ziren lehiaketara. / ARGAZKIAK YARZA

YARZA IKAZTEGIETA.

Atzo, San Loren-tzo egunaren biharamunean, haurren eguna izan zen Ikaztegietan. Goizean zinta-lasterketa antolatu zen plazan. Haur ugarik parte hartu zuten bizikleta gainean, zintzilik zeuden zintak hartzen saiatzeko. Ondoren, Ibiri ganadutegiko zalditxo eta zezentxoak izan ziren udaletxe aurreko zelaian.

Txikienak gustura aritu ziren ponien gainean ibiltzen. Segidan zezentxoak atera ziren eta gaztetxoak gogoz saiatu ziren aurrean korrika eginez harrapatuak izan gabe. Gainera, jaietan toka eta pintxo txapelketak antolatu ziren. Herritar ugarik parte hartu zuten toka txapelketan, amaieran Mattin Jauregi izan zen garaile.

Aldi berean, bederatzi taldek pintxo txapelketan parte hartu zuten elizako arkupeetan prestatutako sukaldeetan. Igor Urreta, Ibon Altuna eta Alaitz Zabalegi izan ziren epaimahaiko kideak. Denak dastatu ondoren, Haritz Artola egindako boletus, foie, urdaiazpiko, galeper arrautza eta piper pintxoa izendatu zuten garaile.

Gaur, koadrilen eguna

Ikaztegietako jaiek gaur ospatuko dute azken eguna koadrilen egunarekin. Goizeko 11:30ean frontoi txikiko pelota txapelketako finalak jokatuko dira. 12:30ean koadrilen arteko bazkaria prestatzen hasiko dira. Bazkaria 14:30ean izango da eta ondoren mus txapelketa antolatuko da. Arratsaldeko 16:00etan haurren-tzako jolasak antolatuko dira eta amaieran apar-festa izango da.

Arratsaldeko 17:30ean poteo herrikoia izango da Elektrotxufla elektrotxarangak alaitua eta 19:30ean koadrilen arteko jolasak antolatuko dira. Jarraian, koadrilen afaria izango da. Gaueko 23:00etan ikazkinaren igoera egingo da. Ondoren, Starlux, Sukarra 37 eta DJ Jo ta txoren kontzertuak hasiko dira.

Fotos

Vídeos