135 dantzari gaztek Zegama hartuko dute igandean

Lasarteko musika ikasleekin egindako elkartrukea. /  TOBERA
Lasarteko musika ikasleekin egindako elkartrukea. / TOBERA

Toberako ikasleek Araiako musika-eskolako ikasleekin kontzertua eskainiko dute astelehenean

DV ZEGAMA.

Musikaren Hamabostaldiarekin agurtu zuen Tobera Musika-eskolak Aste Santuko oporraldiaren aurreko eskola-aldia, eta, oporretatik bueltan, ekintza gehiagorekin emango dio ongietorria ikasturtearen azkeneko hiruhilekoari. Ekintzak dira Tobera Musika-eskolaren bereizgarrietako bat, eta igandean eta astelehenean ekintza esanguratsu bana plazaratuko du.

Hasteko, igandean, Dantzari Txiki Eguna egingo du Zegaman bosgarren aldiz jarraian. Aurtengoan Lazakoko Oin Arin Dantza-taldeko dantzariak eta Beasaingo Aurtzaka Dantza-taldekoak batuko zaizkie Toberakoei. Hamaiketakoaren ondoren, eskolako patio estalitik irtengo dira desfilean guztiak 11:30ean, eta, 3 geldialdi eginda, udaletxearen aurreko plazako saioarekin bukatuko da eguna, 14:00etan. 135 dantzari eta musikari elkartuko dira guztira. Apirilaren 29an dantzaren munduko eguna da, eta aurre hartuko dio hitzorduari Toberak, Dantzari Txiki eguna bi aste lehenago eginda.

Astelehenean, berriz, aurtengo elkartrukearen lehenengo saioa izango da, Zegaman. 2001/2002 ikasturtean hasi zen Tobera beste musika-eskola batzuekin elkartrukeak egiten. Harrezkero, aurtengoa 15. edizioa da. Denbora-tarte honetan, Goierriko Musika-eskolen 1. Topaketa egin zuen eskolak 25 urte bete zituen urtean, eta beste ikasturte batean egin gabe utzi zuen elkartrukea. Gainerako guztietan, urteko musika-eskola bana ezagutu dute.

Aurten Asparreneko Udal Musika-eskola izango dute bisitari. Asparrena Arabako Aguraingo Eskualdeko udalerria da; 10 herrik osatzen dute, eta Araia du udalburu. Astelehenean, Tobera Musika-eskolako Zegamako, Segurako, Zeraingo eta Mutiloako ikasleen eta Asparreneko Udal Musika-eskolako ikasleen arteko kontzertu bateratua arratsaldeko 18:30ean hasiko da, Aitxuri eskolako gimnasioan.

Doako autobus-zerbitzua

Besteak beste, Orkatz abesbatzako zenbait kidek eta Toberako txistulariek Pablo Sorozabalen 'Gernika' hileta-martxa jo eta abestuko dute. 1937ko apirilaren 26ko Gernikako bonbardaketa oroitu nahi du horrela Toberak, eta omenaldia egin, halakorik berriro gerta ez dadin. Horrez gain, dantzariak, trikitilariak, pianoa, saxofoia, klarinetea eta akordeoia ikusi eta entzun ahalko dira. Bukaeran, merienda izango da partaideentzat. Bertaratzea errazagoa izan dadin ikasleentzat, Zegamatik kanpoko ikasleentzat doako autobus-zerbitzua jarriko du Toberak. 17:50ean irtengo da autobusa Segurako plazatik eta 20:45ean izango da itzulera.

Toberako ikasleak maiatzaren 29an joango dira Araiara.

Contenido Patrocinado

Fotos

Vídeos