Buruz buruko Gipuzkoako txapelketari ekingo diote Intxurreko pilotariek

Kadeteen eta nagusien mailetan izango du ordezkaritza herriko taldeak eta guztira zazpi pilotari arituko dira txapelketan

GOIKOETXEA ALEGIA.

Maila eta modalitate ezberdinetan binakakoa amaitu gabe dagoen arren, buruz buruko Gipuzkoako pilota txapelketari hasiera emango diote asteburuan Intxurreko pilotariek.

Kadeteen eta nagusien mailetan izango du ordezkaritza Intxurrek eta guztira zazpi izango dira maila horietan ariko diren pilotariak: kadeteetan Altuna, Zubeldia eta Uzkudun izango dira Intxurreko ordezkariak; eta nagusietan Irazustabarrena, Alberdi, Artola eta Oiarbide lehiatuko dira.

Nagusiekin hasiz, Irazustabarrenak Azkoitian jokatuko du bihar arratsaldeko 16:00etan Unanueren aurka; Artolak Ikaztegietan izango du hitzordua bihar goizeko 10:00etan Gaztelekuko Osaren aurka; Oiarbidek igande goizean jokatuko du Tolosako Beotibarren Biainen aurka; eta Alberdik atsedena izango du lehen jardunaldi honetan.

Kadeteei dagokienez, Zubeldiak Ikaztegietan jokatuko du bihar goizeko 11:00etan Ilunpeko Buldainen aurka; Uzkudunek ere bihar izango du hitzordua toki eta ordu berean Oiarpeko Auburuzaren kontra; eta Altunak atsedena izango du lehen jardunaldi honetan.

Binakako txapelketari dagokionez, lehen ligaxkak jokatzen ari dira oraindik Intxurreko hainbat bikote. Eskuz binaka kadeteen bigarren mailako bikoteak Zumaian jokatuko du ligaxkako azken jardunaldia eta nagusien hirugarren mailako bikoteek abenduko lehen asteburura bitartean jokatuko dituzte lehen faseko neurketak. Gomazko paletan ari diren emakumezko jubenilek ere abenduko lehen asteburuan jakingo dute aurrera egingo ote duten edo ez.

Gaur 18:30ean hasita lau partida jokatuko dira Alegiako Elorri pilotalekuan. Lehen biak gomazko paletakoa izango dira: emakumezko jubenilen bigarren mailan Intxurreko bi bikote ariko dira elkarren aurka; eta lehen mailan, Atzapar izango da Intxurreren aurkaria. Ondoren, eskuz binaka, gizonezkoen nagusien hirugarren mailan, Arrasateko eta Gaztelekuko ordezkarien aurka ariko dira Intxurrekoak.

Talo postua

Udazkeneko hotzari aurre egin asmoz, Sutarri dantza taldeak talo postua jarriko du Alegiako plazan gaur, ostiralarekin. Dantza taldeko arduradunek jakinarazi dute arratsaldeko 18:30etik 21:00etara bitartean plazan egongo direla taloak egiten.

Uraren erreziboak

Gipuzkoako Urakek azaroaren 20ko datarekin bidali dizkie Alegiako bezeroei aurtengo hirugarren hiruhilekoko ura, arazketa eta finantzaketa planeko erreziboak, eta abenduaren 5era arteko epea izango dute borondatez ordaintzeko.

Erreklamazioren bat egin nahi izanez gero, ohiko bideak eskura dituzte bezeroek: Gipuzkoako Uraken bulegoak, 902302222 eta 943318602 telefono zenbakiak eta www.gipuzkoakour.com atari digitala.

Contenido Patrocinado

Fotos

Vídeos