Bost gune, azoka bakarra, 'Euskarak batzen gaitu' lelopean

Iban Balerdi, Maide Aldasoro, Joxepa Madariaga, Argider Arano eta Xabier Albisu aurkezpenea./
Iban Balerdi, Maide Aldasoro, Joxepa Madariaga, Argider Arano eta Xabier Albisu aurkezpenea.

Hilaren 15, 16 eta 17an Ataun, Beasain, Lazkao, Ordizia eta Segurak antolatu dute euskal liburu eta disko azoka

DV LAZKAO.

Durangoko Euskal Liburu eta Disko azoka pasata, goierritarren txanda izango da datozen egunetan, Ataun, Beasain, Lazkao, Ordizia eta Segurako elkarte eta gizarte eragile ezberdinek antolatutako azoka ospatuko baita Goierrin, datorren asteburuan. Bost gune eta bost forma izango ditu aurtengoan ere; Kultur Elkarte, Euskara Elkarte, Gazte Asanblada, Ikastetxe, musika-eskola, euskaltegi, kultura zale, irakurle, Udalek eta bost herrietako liburu-dendek elkarlanean antolatua eta Goierritarrei euskal kultur eskaintza egiteko asmoz pentsatua, urtero moduan.

1989an Lazkaon jaio zen ekimen honek euskal kultura herri guztietan zabaltzea izan du xedea eta gutxinaka joan da haunditzen, helburu honekin, lanera batu direnen taldea. Lehenengo Ataun (2006), gero Segura (2007), ondoren Ordizia (2009) eta azkenik Beasain (2012). Bost izan dira aurtengoan ere azoka antolatzeko elkarlanean jardun duten herri goierriarrak eta bost herri hoietako ordezkariak bildu ziren atzo, Lazkaoko Gerriko liburu-dendan, goierritarrei azoka aurkezteko.

Ostiraletik igandera izango dira zabalik aurten bost guneak, abenduaren 15, 16 eta 17an, eta azkeneko urteei jarraiki, ez dira faltako 2017an argitara emandako liburu nahiz CD edota jokoak bertan; ezta herritarrak erakartzeko ekintzak ere. Jatekoak eta edatekoak egongo dira, mahai inguru, trikitilari nahiz bertsolarien emanaldiak, liburu aurkezpenak, literatura tailerrak... Erosketak guztiak %15eko deskontuarekin egin ahal izango dira gainera, bost herrietako udalei esker.

'Kultur gosea asetzeko'

Ataunen 18:00etan irekiko da azoka, ostiralean, San Martingo Herri Antzokian aurtengoan. 18:30ean, Ataungo Irakurle Taldearekin elkarlanean, 'Nola iritxi naiz honaino' liburua landuko dute Kattalin Miner idazlearen laguntzaz eta 19:30ean disko berria aurkeztuko du Unidad Alavesa taldeak.

Larunbatean 'Herritarren txokoa' deitu diote goizeko egitarauari, ataundarrak izango baitira azokako protagonista. Ioar Aizpuruak 'Ataun irratia' proiektua aurkeztuko du 12:00etan eta 12:30ean Joan Arin Dorronsoro liburuaren bigarren edizioa aurkeztuko dute, Izaskun Egiguren idazlearen eskutik. Arratsaldean, Alberto Iratzuk 'Rocka puntua!' liburua aurkeztuko du 18:00etan eta Bi Bala taldearen 'Arazo modernoak' diskoaren aurkezpena egingo dute ondoren, 19:00etan.

Igandean, amaitzeko, haurren- tzako ipuin kontaketa saioa izango da 11:00etan, Herri eskolako ikasleen eskutik, eskulan tailerra 12:00etan, NAZArekin elkarkanean, eta Tere Irastorzaren 'Txoriak dira bederatzi' liburuaren aurkezpena, 13:00etan. Azokaren ordutegia honakoa izango da: ostiralean 18:00etatik 20:00etara, larunbatean 11:00etatik 14:00etara eta 16:00etatik 20:00etara, eta igandean 11:00etatik 14:00etara.

Beasainen, Gernika pasealekuan izango da azoka, urtero moduan; ostiralean 11:00etatik 13:00etara eta 17:00etatik 20:00etara, larunbatean 11:00etatik 14:00etara eta 17:00etatik 20:00etara, eta igandean 11:00etatik 15:00etara. Ostiral goizean ikasleek bisitatuko dute azoka, gabonetako kartel lehiaketaren sari banaketa egingo baita bertan, baina arratsaldean izango da irekiera ofiziala, irakurle taldekoekin; Mikel Etxabururen 'Lo zaudela zabalduko dizkizut begiak' liburuaren inguruko solasaldia egingo dute 17:30ean. Larunbatean, berriz, Musika Eskolako trikitilariak izango dira 12:00etan, giroa berotzen, 'June eta meategiko iheskariak' liburuaren aurkezpena egingo dute 13:00etan, eta kantu-jira arratsaldeko 18:30ean, amaitzeko.

Ordizian Zuhaiztin izango da aurtengo azoka, Barrenako espazio arazoak direla eta, Labealde okindegiaren aldameneko lokalean. Ostiralean irekiko da 17:00etatik 20:00etara, larunbatean 10:00etatik 13:30era eta 17:30etik 20:00etara, eta igandean 11:00etatik 14:00etara.

Seguran, Botika Xahar kulturgunean izango da aurten ere euskal liburu eta disko azoka; ostiralean 18:30etik 20:30era, larunbatean 11:00etatik 14:30era eta 17:00etatik 20:30era, eta igandean 11.00etatik 14.00etara. Ostiralean herriko egutegirako argazki lehiaketako sari-banaketa egingo da bertan, eta Azpilla dantza taldeko errifaren zozketa. Herriko koruak emanaldia eskainiko du gainera eta gazta eta ardoa banatuko dira hurbiltzen direnen artean.

Baina azokaren egitaraua zabaldu asmoz, beste bi saio ere antolatu dituzte. Gaur, Jakoba Rekondoren 'Landareak lantzen' liburuaren aurkezpena egingo dute kulturetxean, 19.00etan, eta abenduaren 18an, Joseba Insausti segurarrak 'Euskara berri modernoa egiten' hi-tzaldia eskainiko du. Azken hau ere kulturetxean izango da, 19.00etan.

Lazkaon, urtero moduan, plazako frontoiean egingo da azoka. Ostiralean zabalduko da, 16:30etik 20:00etara; larunbatean egun guztian zehar egongo da irekita, 10:00etatik 20:00etara, eta igandean, goizez, 11:00etatik 14:00etara. Jolasak eta bertsolariak egongo dira larunbatean eta asteburu guztian zehar, hotzari aurre egiteko, salda eta txokolate beroa. Ikastolako ikasleek bigarren eskuko jostailuak ere salduko dituzte, merkatu txikian.

#ataunipuinak

Ataungo antolatzaileek jolas txiki batera gonbidatu nahi dituzte gainera herritarrak, twiter bidez. Bakoitzak bere sormena landuz, kontakizun edo ipuin txikiak egin behar ditu istoriotxo hauekin azoka apaintzeko. #ataunipuinak traola erabiliz, tuit batean kabitzen den istorioa kontatu behar da, nahi izanez gero irudi edo bideo batez lagunduta, baina bakoitzaren sormenetik ateratakoa izan behar du (ez du balio abesti edo ipuin batetik hartutako esaldia izatea). Asteburu guztian zehar egingo dira ikusgai ipuin guzti hauek azokan eta parte hartzaile guztien artean, bertan gastatzeko 20 euroko bale bat zozketatuko da gainera larunbatean.

Contenido Patrocinado

Fotos

Vídeos