Biktima guztien memoriaz ongarrituko den Zizurkil irudikatu zen

Indarkeriak eraildako herritarrak omendu ziren landatu berri den Gernikako haritzaren inguruan./
Indarkeriak eraildako herritarrak omendu ziren landatu berri den Gernikako haritzaren inguruan.

I. ARRATIBEL ZIZURKIL.

Zizurkilgo Udalak eta Hernandorena kultur elkarteak indarkeria ezberdinen biktimak elkartu zituzten P.M. Otaño plazan egin zen ekitaldi xume eta goxoan. Poesia eta bertsoek tartekaturik, Joxin Azkue Hernandoren taldeko kideak Gernikako haritzak euskaldunontzat duen esanahia azaldu zuen, Zizurkilen landatu den haritzaren nondik norakoak zehazteaz gain. Ondoren etorri zen Udalaren adierazpena. Eva Usandizaga giza eskubideetarako zinegotziak irakurri zuen Udal gobernuaren idatzia. «Bizi izan ez dugunok ezin dugu irudikatu indarkeriaz gertuko bat galtzeak zer esan nahi duen», hasi zen Usandizaga, Zizurkilen ere indarkeriak bere lorratza utzi duela azpimarratuz. «Gernikako haritzaren alboan nola ez gogoratu 36ko estatu kolpe faxistak hildako zizurkildarrez. Eta gertuago etorrita trantsizioa deitu zitzaion garaiko urte nahasietan ETAk hildako Julian Galarza herritarra gogoan dugu, edo hurrengo hamarkadetan polizia indarkeriak erahil eta oraindik aitortzarik ez duten bi herritarrak: Zalantzarik gabe, sufrimenduaren mapa anitza bezain gordina da».

Ondoren, autokritika egin zuen Udalaren izenean. «Zizurkilgo Udaletik, gaurko ekitaldi hau baliatu nahi genuke zuen ondoan gaudela esateko. Eta bai, guri ere autokritika egitea dagokigu, ohartzen baikara sufrimenduaren tamainako erantzunik ez dugula eman sarritan. Guztiok errazago begiratu diogu gertuko sufrimenduari urruneko jotzen genuenari baino. 2015ean udalbatzak Galarza aitortzeko onartu zuen idatziak dioen bezala, barkamenak eskatzen dizkizuegu guztioi inoiz ahaztuak edo baztertuak sentitu bazarete eta elkarlana eskaintzen dizuegu aitortza, egia eta justizia lortzeko bidean. Ez dugu alderaketarik egin nahi, ez dugu ekidistantziatik hitz egin nahi, indarkeria bakoitzak izan ditu bere ezaugarriak, baina Udal bezala argi utzi nahi dugu guztiok aitortzen zaituztegula. Guztiok duzuela egia eta justiziarako eskubidea. Zizurkilgo Udala ondoan duzue, eta izango duzue. Ekitaldi honetan konpromiso hori hartzen dugu».

Gertatuaren egia osoa bistaratzeko beharra azpimarratu zuen Zizurkilgo Udalak. «Guk ez diogu beldurrik egia osoari. Frankismoak fusilatu eta isildu zituztenena, ETAren biktimena eta oraindik inongo aitortzarik ez duten polizia zein estatuak eragindako biktimena. Egia horretan oinarritua, bakoitzak bere baitara zintzo begiratuz soilik egingo dugu aurrera. Errelatoa ez bada osoa, ez bada benetakoa, ezingo dugu sendo aurrera egin». Ondoren, memoria konpartitu hori irudikatu eta memoriadun herria aldarrikatzeko, P. M. Otaño plazara hurbildutako biktima ezberdinek haritzari lur pixka bat bat bota zuten eta biktima guztientzat egia, justizia eta erreparazioa eskatzen duen Udalaren oroigarri bat jaso zuten, hunkituta. Ekitaldi xumea, elkarbizitzan aurrera urratsa emateko.

Contenido Patrocinado

Fotos

Vídeos