Bihar itzuliko dira pilota partidak Elorri pilotalekura

GOIKOETXEA ALEGIA.

Amaitu zaizkie oporrak Intxurreko pilotariei. Urtero bezala, Gipuzkoako txapelketa izango da denboraldi berriko lehen erronka eta asteburuan hasiko dira eskuz binakako eta gomazko paletako ligaxkak. Eskuz binaka gizonezkoen kadete eta nagusien mailetan izango du ordezkaritza Intxurrek. Kadeteen lehen eta bigarren mailetan eta nagusien lehenengoan bikote bana izango du eta nagusien hirugarren mailan lau bikote izango dira, hiru multzotan banatuta. Multzo bakoitzeko lehen biak sailkatuko dira hurrengo kanporaketetarako.

Gomazko paletan, berriz, emakumezkoen jubenilen eta nagusien lehen eta bigarren mailetan izango du ordezkaritza Intxurrek. Jubenilen bigarren mailan hiru bikote izango dira eta beste mailetan, bana. Jubeniletan lehen hirurek egingo dute aurrera eta nagusietan, lehen bi sailkatuek.

Lehen jardunaldiko partidei dagokienean, bihar eta etzi jokatuko dira partidak Alegiako Elorri pilotalekuan. Biharko jaialdia 19:00etan hasiko da eta hiru partida jokatuko dira. Lehena, eskuz binaka, gizonezkoen kadeteen bigarren mailakoa izango da eta Intxurrek Behar Zanaren aurka jokatuko du. Bigarren neurketa gomazko paletakoa izango da: emakumezko nagusien lehen mailan, Intxurre eta Su Berri ariko dira nor baino nor. Azkenik, berriz ere eskuz binaka, gizonezkoen nagusien hirugarren mailan, Intxurreko bi bikotek neurtuko dituzte indarrak

Larunbat goizeko partida 10:00etan izango da: eskuz binaka, gizonezkoen nagusien lehen mailan, Intxurre eta Tolosa-Aurrera izango dira aurrez aurre.

Abesbatzen entseguak

Alegiako Txintxarri eta Txintxarri Txiki abesbatzek gaur, ostegunarekin, hasiko dituzte ikasturte berriko entseguak: gazteenek 19:30etik 20:30era eta helduek 21:00etatik 22:30era. Garbiñe Orbegozoren zuzendaritzapean ariko dira bi abestaldeak eta, esanda bezala, ostegunero elkartuko entseguetarako kultur etxeko areto nagusian.

Abesbatzan abestu nahi duten guztiek (alegiarrak zein kanpotarrak) ateak zabalik dituzte. Izena eman nahi dutenek kultur etxean utz ditzakete euren datuak edo, bestela, abesbatzako kideren batekin harremanetan jar daitezke. Txintxarri Txiki abesbatzan abesteko adin tartea zabaldu egin dute: hala, zazpi urtetik hamasei urte bitarteko haur eta gaztetxoek kantatu ahal izango dute koruan (LHko 2. mailatik DBHko laugarreneraino, alegia).

Fotos

Vídeos