Aurten ere abian da 'Irakurri, gozatu eta oparitu' kanpaina

Irakurzaletasuna sustatzea da kanpainaren xedea. / MORQUECHO
Irakurzaletasuna sustatzea da kanpainaren xedea. / MORQUECHO

Euskarazko liburuak merkeago eskuratzeko aukera izango dute irakurle lazkaotarrek ekimen honi esker

DV LAZKAO.

Martxoaren 12an jarri zuen martxan Euskaltzaleen Topaguneak, Irakurri, gozatu eta oparitu egitasmoaren hamabigarren edizioa, zenbait euskara elkarte, udal liburutegi eta liburu dendarekin batera eta hainbat Udal eta mankomunitate, Nafarroako Foru Gobernua eta Eusko Jaurlaritzaren Kultura saila zein Araba eta Bizkaiko Foru Aldundien babesarekin.

Irakurzaletasuna bultzatzeko xedea duen egitasmo honek herritarrak euskarazko liburuak irakurtzera animatu nahi ditu, «irakurtzearen alde atsegina azpimarratuz eta liburutegi publikoen zerbitzuen erabilera sustatuz», eta helburu honekin jarri dira berriro elkarlarean herrietako Euskaltzale Elkarteak, Euskara zerbitzuak, liburutegiak eta liburu dendak. Lazkaoko kasuan hamargarren urtez errepikatuko da kanpaina eta Gerriko Kultur Elkartea eta Udala izan dira aurten ere antolatzaile, Lazkaoko Udal liburutegiaren babesa eta Gerriko liburu dendaren laguntzarekin.

Aurreko urteetan ikusi denez, kanpainak eragin positiboa du herritarrek udal liburutegietan egiten duten euskarazko liburuen mailegu erabileran eta horixe da, hain zuzen ere egitasmoaren nahietako bat, euskaldunak liburutegi publikoen erabiltzaile bihurtzea. Eragin positibo honen adierazgarri, aurtengoan kanpainara batu diren 45 udalerriak dira; azpimarragarria da aurreko lau urteetako herri gehienetan errepikatuko dela kanpaina. Era berean, ekimenak liburuen salmentan izaten duten eragina ere kontutan hartzekoa dela diote antolatzaikeek.

%35eko deskontua

Kanpainaren izenak berak argi adierazten duenez, hiru pausu eman behar dira parte hartzeko. Lehenengo pausoa irakurtzea da, euskaraz irakurtzea alegia. Horretarako, herriko liburutegi publikora joan eta euskarazko edozein liburu maileguan eskuratu behar delarik.

Bigarren urratsean liburua irakurri, liburutegira itzuli, eta fitxa sinple bat bete beharko da. Bertan, irakurritako liburua zein den eta honi buruz zer iritzi dugun adierazi behar da. Hau egin ondoren, liburuzainak erosketa-txekea emango digu, hi-tzartutako liburu dendan erabiltzeko, eta txeke honekin, euskarazko edozein libururen prezioan %35eko deskontua izango dugu kanpainaren hirugarren eta azken pausoa betetzeko; liburua oparitzea, lagun bati, senide bati, edo norbere buruari.

Liburutegian jasotako erosketa-txekeaz gain, apirila eta maiatza bukaeran beste 30 euroko txeke baten zozketa egingo da gainera herri guztietan, hilabete bakoitzean irakurle fitxa bete dutenen artean, eta txeke berezi honek, besteek bezala, euskarazko liburuak merkeago erosteko aukera emango du.

Aurten, azken urteetan bezala, udaberriko hilabeteetan garatuko da egitasmoa, alde batetik liburutegietan garai hobea izaten delako, eta bestetik, liburu-opari eta trukeen dinamika opor aurreko hilabeteetan eginez «udako liburua» opari hartutakoa izatea sustatu nahi delako. Honela, kanpainaren hirugarren hurratsa indartu nahi da «liburuak eta horiek elkarri oparitzea sozializariorako tresna bihurtuz». Iaz bezala, aurtengoan ere irakurle txoko, mintzalagun, ikastalde, kultur talde eta abarretako kideei liburuak elkarri oparitzea, irakurri ondoren trukatzea eta irakurritakoa kontrastatzea proposatuko zaie, «taldeen dinamika eta kideak aberasteko praktika gisa».

Martxoaren 12an abiatu zen 'Irakurri, gozatu eta oparitu'ren 2018ko edizioa, esan bezala, eta maitzaren 31n amaituko da; bi hilabete eta erdiko iraupena izango du beraz aurtengo kanpainak, liburutegietan. Erosketa-txekeak liburu dendetan erabiltzeko epea berriz, ekainaren 15 arte luzatuko da.

Contenido Patrocinado

Fotos

Vídeos