Atez atekoa eta 2018ko aurrekontua direla eta, EH Bilduk Herrigintzari erantzun dio

«Birziklaguneetan kaleko bereizketa maila egongo balitz, gaikako bilketa %75tik %85ra» igoko litzatekeela uste du

RUFINO IRAOLA ZALDIBIA.

Hondakinen atez ateko bilketa dela eta 2018 aurrekontua direla eta, Herrigintzanek ateratako komunikatuari erantzun dio EHBilduk. Koalizioaren baitan, «hauteskundeak datorren urtean dira eta hasi da hori nabaritzen udal jardunean. Badirudi oraingoan ere Zaldibia Herrigintzanen programako gai-izarra hondakinena izango dela (...) Azken hilabeteetan ez dute batzordean jarraikortasunez parte hartu».

EH Bilduren esanetan, «batzordea gainetik pasatu eta Sasietarekin bilera nahi zutela esaten zuten behin eta berriz. Esan genien hondakinen bilketa udalaren eskumena dela eta beraz, batzordean hobekuntza proposamenak landu ondoren bilduko ginela haiekin.

Birziklaguneetan

Bilera hartarako, beti ere koalizioak azaldu duenez, «Sasietako teknikariek egindako azalpena jaso zuten, eta han ageri da non kokatzen den arazo nagusia: Tejeri, Bilore eta Gaintzako bidegurutzeko birziklaguneetan, eta ez atez-ateko bilketa eremuan».

Udaleko hondakin batzordeak azterketa juridiko, sozial, ekonomiko eta teknikoa egiteko Luar enpresa kontratatu zuen, «baina gastua ez zuen Udalak bakarrik ordaindu, Foru Aldundiak ordaindu baitzuen kostuaren %65», salatu du EHBilduk «Beraz, herritarrak, hondakin batzordea eta Sasieta bat gatoz hiru guneetako egoerari irtenbidea eman behar zaiola. Zaldibia Herrigintzani adierazi nahi diogu ez ditzala kontzeptuak apropos nahastu. Herrian bi bilketa sistema ditugu: herrigunean atez-atekoa eta landa-eremuan edukiontzi bidezkoa. Eta arazoa bigarren honetan dago», koalizioaren ustez.

«Arazo hau konpontzeko Sasietarekin hainbat bilera egin ditugu eta Zaldibia Herrigintzaneko ordezkariek ez dute bilera hauetan kasik parte hartu, ezta hartutako erabakien berri izateko gurekin harremanetan jarri ere», salatu dute oharrean.

Azken neurriak

«Neurri hauek hartu dira azken asteetan: orain txartel bakoitzak gune bakarrerako balio du, Atez ateko bilketa zabaldu da kamioiaren ibilbidean eskura dauden hainbat baserrietara, formazio eta informazioa eman die Sasietako teknikariak, ikuskatzailea egunero gune guztietatik pasatzen da eta zigor-espedienteak zabaltzen zaizkie erabilera okerra egiten dutenei», diote oharrean.

EH Bilduk plazarazi dituen datuen arabera, «herriguneko familia batek baino 3 aldiz errefusa gehiago botatzen du birziklagunea erabiltzen duen familia batek; ekonomikoki, herriguneko errefusa tratatzeko 6.114 euro gastatzen dira urtean eta hiru guneetakoa tratatzeko, berriz, 10.973euro, erabiltzaile gutxiago izanagatik ere; birziklaguneetan kaleko bereizketa maila egongo balitz, Zaldibiako gaikako bilketa %75ekoa izatetik %85ekoa izatera pasako li-tzateke».

Koalizioak datozen hilabeteetan «konponbide» honen bila jarraituko du eta «Zaldibia Herrigintzaneko ordezkariek lanean aurkituko gaituzte. Inbertsioen ataletik 25.950 euro bideratu ditugu horretarako, eta ez 13.800 euro».

Komunikatuan, bide batez, elkartasuna adierazten diete Ainhoa Intxaurrandieta eta Iñaki Errazkini, eta CUPOa ere aipatu dute: «PPk gehiengo osorik ez duela aprobetxaturik, Madrildik puxkak ekarriz eta hemen urrearen pare salduz dabiltza EAJkoak».

Contenido Patrocinado

Fotos

Vídeos