Ataun Kirol Elkartea, gomazko paletako nesken txapelketaren garaile

Partida nahiko borrokatua joan zen 10. tantora iritsi arte, hortik aurrera txapelak Goierriko norabidera gerturatzen hasi ziren. Atzealdean Elorrik ohizkoa den bezala bere erregulartasuna erakutsi zuen oso kontzentratuta egon zen partida osoan zehar.

Amaiak berriz aurrealdean partidaren iparra eraman zuen, bere teknikaren erakusle izan zen eta oso tanto politak eskaini zituen frontoira hurbildutakoei. Lau neskek ikuskizun oso dotorea erakutsi zuten. Aipamen berezia merezi du Atzapar taldeko Uxue Aramburuk ere, atzetik erakutsitako bere ezker dotore eta indartsuarekin.

Bestalde, Ataun Kirol Elkarteko taldean Maialen Galparsororen papera ere goraipatzekoa da. Nahiz eta azken partida honetan parte ez hartu, urte guztian zehar egindako lana beharrezkoa izan baita final hau irabazteko.

Azkenik, Josu Munduate hiruko hauen entrenatzailearen lana ere ezin bestekoa suertatzen da, lortutakoak erakusten duen bezala. «Zorionik beroenak guztioi eta eskerrik onenak egindako lanarengatik», diote Ataun Kirol Elkartetik.

Bestalde esan, Ataun Kirol Elkarteko gabonetako saskia aurten Xabat Barandiaran-i suertatu zaiola 1.198 zenbakiarekin. Xabatek Ataungo Errotaundi okindegian jaso zuen saski ederra.