Asteburuan bost partida ikusi ahal izango dira Elorri futbol zelaian

GOIKOETXEA ALEGIA.

Intxurreko futbolarien-tzat ez zen batere oparoa izan iragan asteburuko jardunaldia. Jokaturiko zazpi partidetan berdinketa bakarra lortu zuten eta jada hurrengo jardunaldiari begira jarrita daude. Alegiarrek herriko futbolariak gertutik ikusteko aukera izango dute asteburuan, zazpi partidetatik bost etxean jokatuko baitituzte Intxurreko futbolariek.

Erregionalek 8-0 galdu zuten Elgoibarren. Sailkapenean hirugarrenak dira bederatzi punturekin eta Azpeitian ariko dira hurrengo jardunaldian seigarren dagoen Ikasberriren aurka. Jubeniletan, igoera fasean diren mutilek 2-1 galdu zuten Antigua Luberriren aurka. Hirugarren postuan daude eta Ostadarren zelaian jokatuko dute hurrengo partida. Maila bereko neskek burua altxa ezinda jarraitzen dute. 4-0 galdu zuten Deban eta Zarautzen aurka jokatuko dute hurrengo neurketa etxean.

Kadeteek urratu zuten asteburuko puntu bakarra. Tolosaren aurka hutsean berdindu zuten etxean eta seigarren jarraitzen dute zortzi punturekin. Hirugarren dagoen Billabonaren aurka jokatuko dute Elorrin asteburuan. Infantiletan, Aralar Intxurreko hiru taldeek galdu egin zuten. Mutiletan, txapeldunen fasean den Aralar Intxurre Ak 1-4 galdu zuen Euskalduna liderraren aurka eta bigarren den Soraluzeren aurkakoa jokatuko dute asteburuan Alegian. Kopa jokatzen ari den taldeak 1-8 galdu zuen Lazkaoren aurka eta bigarren dagoen Idiazabalen bisita jasoko dute asteburuan. Neskek, berriz, Goierri Gorriren aurka jokatuko dute etxean. Azken partidan 3-2 galdu zuten Urnietan.

Contenido Patrocinado

Fotos

Vídeos