Aralar Intxurre Ak garaipenarekin hasi du txapeldunen faseko ibilia

Infantilen mailako mutilen bi taldeek bikain hasi dituzte txapeldunen faseko eta Kopako lanak. /  RENOBALES
Infantilen mailako mutilen bi taldeek bikain hasi dituzte txapeldunen faseko eta Kopako lanak. / RENOBALES

GOIKOETXEA ALEGIA.

Aralar Intxurreko infantilen mailako mutilen bi taldeek garaipen bana lortu dute asteburuan jokaturiko partidetan. Aralar Intxurre Ak txapeldunen faseko lehenengo partida jokatu zuen Antigua Luberriren aurka eta 4 eta 0 irabazi zuen. Lehen hiru puntuak batuta, Añorgaren zelaian ariko dira hurrengo partidan. Aralar Intxurre Bk ere bikain hasi du Kopa, 3 eta 1 irabazi baitio Beasaini lehiaketa horretako lehenengo neurketa. Ordizian jokatuko dute hurrengoa. Maila bereko neskek ere pasa den asteburuan ekin berri diote Kopari; horiek, ordea, 3-1 galdu zuten Ostadarren zelaian. Hurrengo jardunaldian atsedena izango dute.

Beste taldeei dagokienean, erregionalen mailako gizonezkoek 4-0 galdu zuten Eibartarraken aurkako Kopako partida. Laugarrenak dira sei punturekin eta zazpigarren dagoen Arizmendiren aurkakoa izango dute asteburuan.

Koparekin jarraituz, jubenilen mailako emakumezkoek 5-0 galdu zuten Oñatin. Punturik batu gabe jarraitzen duten bederatzigarrenean, eta hiru postu gorago dagoen Goierri Gorriren bisita jasoko dute asteburuan.

Kadeteen mailako mutilak ere punturik gabe geratu dira asteburuan Aizkorri Goierriren aurkako Kopako neurketa 2-3 galdu ondoren. Sailkapeneko laugarren postuan daude zazpi punturekin, eta Ordizia liderraren aurka ariko dira asteburuan.

Azkenik, jubenilen mailako gizonezkoek igoera faseko hirugarren porrota jaso dute Ekintza liderraren aurka 2-0 galduta; hirugarren jarraitzen dute eta asteburuan garaipenaren bidera itzultzen ahaleginduko dira etxean seigarren dagoen Orereta Kafea taldearen aurka.

Contenido Patrocinado

Fotos

Vídeos