Diario Vasco

Gaur hasiko da sagardotegi denboraldia Oiharten eta Otatzan

Otatza sagardotegia gaur ere bete egingo da.
Otatza sagardotegia gaur ere bete egingo da.
  • Oiharten Iker Zubeldia, Unai Agirre eta Aitor Mendizule bertsolariak arituko dira. Otatzara, aldiz, Iñaki Artola pilotaria joango da

Beterriko sagardotegi denboraldia inauguratu duten aste berean, iritsi zaie Zeraingo sagardotegiei ere ateak eta kupelak irekitzeko garaia. Festa giroan egingo dira irekiera ekitaldiak gaur iluntzean, eta hortik aurrera, udaberrira arte egongo da nahikoa aukera aurtengo sagardoaren uztaz, jaki goxoez eta konpainia onaz gozatzeko Zerain aldean.

Oiharteko denboraldiaren irekierako festan, Iker Zubeldia (Txapi), Unai Agirre eta Aitor Mendiluze bertsolariak izango dira sagardoak bezain txispa fina jartzen. Haiekin batera izango dira giroa alaitzen Mikel eta Andoni herriko trikitilariak ere. 20:30etik aurrera, ez da festa-girorik faltako Oiharte aldean. Ohi bezala, lehen eguneko menuan txotxa debalde izango da.

Otatzan ere, ordu berean izango da txotxaren irekiera ofiziala. Iaz aizkolariek ireki zituzten kupelak, eta aurten beste kirolari bati egokitu zaio ohorea: Iñaki Artola, Alegiko pilotari gazteari. Lehen tragoa hark egin ostean, izango da non gozatua eta festa egina, trikitilarien giro alaiaren laguntzaz. Beti bezala, Otatzan ere gaurko txotxa dohainik izango da.

Iritsi da 2017ko sagardo denboraldia ere herrira. Aurten ere saiatu dira Otatzan eta Oiharten ahalik eta sagardo onena egiten, ahalik eta bertako sagar gehienarekin. Gainera, berriki sortu den euskal sagardoaren jatorri izendapenean sartuta daude herriko bi ekoizleak. Etorkizunari begira jarrita, kalitatezko sagardoa bertako sagarrarekin ekoizteko sekulako sagarrondo landaketa egin dute Oiharte azpiko lur-sailetan negu honetan.

Otatzan nahiz Oiharten, sagardoak badu etorkizunik Zerainen. Goza dezagun aurtengo uztaz eta sagardo denboraldiaz. Txotx!

Temas

Recibe nuestras newsletters en tu email

Apúntate