Diario Vasco

Goierriko laugarren etapa igandean Amalurrekin

Igandean, abenduak 4, Amalur Mendi Elkarteak eta San Benito Ikastolak ikasturte honetan antolatutako zazpigarren irteera izango da, Goierriko biraren laugarren etapa oraingoan. Hirugarren etapa Aginaga auzoan (534 m) bukatu zuten eta bertatik abiatuko dira igandekoan.

Ibilbidea Urretxuko Etxeberri (334 m) jatetxe ondotik pasatuko da eta, Lizarriturri (725 m) iturritik igaroz, Irimo gaineko gurutzeraino (855 m) helduko dira mendizaleak. Gailurreriaz edo kresterioz ibiliz, Arrizuri (894 m) eta Kateaga (745 m), besteak beste, igaro eta Deskarga (490 m) mendatera iritsiko direlarik. 570 metroko desnibela, hamabi kilometro eta erdiko luzera eta lau orduko iraupena izango ditu guztira ibilaldiak; «erraza Irimo arteko zatia kenduta», antolatzaileen esanetan.

Joan nahi duenak abenduaren 2rako, ostirala, eman behar du izena, eguerdiko 14:00ak baino lehen, eta 657.72.21.31 telefono zenbakira deitu edo amalur.me@gmail.com helbide elektronikora mezu bat bidali dezake horretarako. Irteera igandean izango da, 8:30ean, Itzala taberna paretik eta itzulera 13:30ak aldera. Gaztetxoek bi euro eta helduek bost euro eraman beharko dituzte autobuserako.

Mendizale txartela

Bestalde, Amalur Mendi Elkartetik jakinarazi nahi dute, 2017rako mendizale txartela atera edo berritu nahi duenak elkarteko bulegoan egin dezakeela datozen asteetan. Gaur, azaroak 30, eta abenduaren 1, 2, 12, 13, 14, 15, 16, 19, 20, 21, 22 eta 23an, iluntzeko 19:00etatik 20:00etara izango dira bertan arduradunak.

Gerrikoren errifa

Gerrikotik eskerrak eman nahi dizkie errifak saltzen edo erosten, aurtengoan ere Kultur Elkarteko zozketan parte hartu duten guztiei eta bide batez, irabazleak zein izan diren ezagutarazi.

Pasa den ostiraleko afarian egin zuten zoketa eta bi zenbaki sarituak 3.374 eta 4.252 izan ziren. Hauen jabeak hamabost eguneko epean azaltzen ez badira, beste bi hauek sarituko dira: 0.018 eta 4.990.

Irabazleek bi lagunentzako asteburu bateko egonaldiaz gozatzeko aukera izango dute landetxe batean.

Honen inguruan informazio gehiago nahi dutenek 943.16.02.82 edo 943.88.65.00 telefono zenbakietara deitu dezakete.

Recibe nuestras newsletters en tu email

Apúntate