Diario Vasco

Garai bateko linu lanak ikusgai Larraulen

 Bisitari ugari gerturatu ziren Larraulera linuaren prozesua ezagutzera.
Bisitari ugari gerturatu ziren Larraulera linuaren prozesua ezagutzera. / ARGAZKIAK NÚÑEZ

Harria eta egurraren ondoren linua izan zen Larraulen protagonista. Dina7 taldeak urte guztian lantzen ari den linuaren inguruko proiektuari amaiera eman zioten larunbat goizean linua ehuna bihurtzeko erakustaldiarekin. Jende ugari erakarri zuen ekitaldiak eta interes handia erakutsi zuten proiektuaren inguruan.

Frontoian linua lantzeko prozesu osoa irudikatu zuten, pausoz-pauso ereitetik maindire edota soineko bihurtu arte. Lehenengo pauso bakoitza azaldu zuten, garai batean nola egiten zen aipatuz, baita proiektuaren baitan nola egin duten ere. Pauso bakoitzean Dina 7 taldeko kideez gain, prozesua ondo ezagutzen duten gipuzkoarrak aritu ziren.

Prozesua azaldu ondoren, bakoitzak bere lanari ekin zion, prozesu guztia jarraian ikusteko aukera izan zelarik: liho-putzuan beratzen jarri, lehortzen jarri, liharri eta mazarekin lihotu, gero trangatu, sugartu eta ezpatatu, txarrantxatu, irun, matazatu, haria egosi eta harilkatu. Lihoarekin egindako soinekoak eta ehunak ikusteko aukera izan zen, besteak beste, Larraulen eta Gaztelun egindako arreoak.

Proiektua joan den martxoan hasi zuten linuaren landaketarekin. Herrian antzina ugari landatzen zen eta oraindik ere ateratzen da landarea, eta horietatik lortu zituzten haziak. Erosi ere egin zituzten hazi batzuk, bi motak alderatzeko. Landarea jaso ondoren, lehortu eta haziak kendu zizkioten karramarekin eta ondoren, urriaren 12an, Koldo Jauregik berreskuratutako Katillutxulo errekaren ondoko linu-putzuan beratzen jarri zuten, bederatzi egunez. Beratzerakoan linuaren zuntzak askatzea lortzen da eta, hilabete inguru lehortzen egon ondoren, frontoiko erakustaldian zuntzak askatu eta haria nola egiten den ikusi ahal izan zen Larraulen. Herrian hainbat linu-putzu baziren ere, ez dago linu-putzuak lanean ezagutu dituen herritarrik. Hori dela ere, prozesu guztia islatzen duen liburua argitaratu dute bildutako informazioarekin eta jasotako esperientziarekin.

Recibe nuestras newsletters en tu email

Apúntate