Diario Vasco

Belkoaingo defentsa sistemaren garrantzia azaldu zuen Carlos Almorzak

Carlos Almorzak Sasesa defentsa sistema eta Gerra Zibilak eskualdean izan zuen eragina azaldu zuen.
Carlos Almorzak Sasesa defentsa sistema eta Gerra Zibilak eskualdean izan zuen eragina azaldu zuen. / NÚÑEZ
  • Gaur, goizeko 10:00etatik aurrera, DINA7 taldeak urte hasieran hasi zuen linuaren inguruko proiektuari amaiera emango diote

Larraulgo kultur astea aurrera doa, eta aurtengo hitzaldi sortari amaiera emateko Aranzadi elkarteko Carlos Almorzak Saseta defentsa sistema azaldu zuen. Gerra Zibilan Candido Saseta komandanteak asmatutako defentsarako sistemak ia hilabete berandutu zuen alde soldadu nazionalen aurreratzea Oria bailaratik.

Almorzak joan zen urrian argitaratutako 'Saseta defentsa-sistema: armatutako erresistentzia antifaxista Adunan, Asteasun eta Zizurkilen' liburuan biltzen diren datuak azaldu zituen larrauldarren aurrean, bailarako memoria historikoa berreskuratzeko hiru urteko lanaren ondorioa dena eta 1936an tropa frankistei aurre egin zien bailarako erresistentziaren lana jasotzen duena.

Gaur linuaren erakusketa

Gaur, larunbatean, goizeko 10:00etatik aurrera, DINA7 taldeak urte hasieran hasi zuen linuaren inguruko proiektuari amaiera emango diote, Ekomuseoaren atarian. Euria bada, frontoian egingo da. Gainera, goiz guztian linua lantzeko antzina erabiltzen ziren lanabesak eta lan egiteko modua islatzen duen erakusketa eta erakustaldia egongo da. Arratsaldean, 18:00etan break dance emanaldia egongo da Txino eta Nakeden eskutik, San Esteban plazan. Bihar igandea, plazatik emango zaio hasiera aurtengo mendi ibilaldiari. Arratsaldeko 18etatik 20etara 2017ko egutegiaren argazki aukeraketa udaletxeko atarian.

Zumarragako feriara irteera

Urteroko legez, Zumarragako azokara irteera antolatu du abenduaren 13rako, Santa Luzia eguna ospatzeko, Aiztondo Zerbitzuen Mankomunitateak. Autobusa goizeko 8:00etan pasako da Larrauldik eta Zumarragara iristean feria ikusteko aukera egongo da goiz osoan.

Ondoren bazkaria egingo da, ondorengo menuarekin: urdaiazpikoa, entsaladilla errusiarra, frijituak, piper beteak, arrain budina, biribilkia saltsan, tarta izozkiarekin, kafea, ardoa eta ura. Izen-emateko epea irekita dago jada eta Aiztondoko bulegoetara deituta egin beharko da, 943.69.39.30 telefonoan. Irteerako prezioa 23 eurokoa izango da eta ordainketa autobusera igotzean egingo da. Antolakuntzak lehenbailehen izen ematea gomendatzen du.

Recibe nuestras newsletters en tu email

Apúntate