Diario Vasco

Musika-zale eta musikari izatea bat dira Tobera Musika-eskolan

  • Gaur, 22an eta 30ean emanaldiak emango dituzte ikasleek

Lanean emango du eguna Tobera Musika eskolak musikarien zaindariaren egunean. Santa Zezilia musikarien zaindariaren eguna datorren asteartean izango da. Egun horren aitzakiatan jendaurrera aterako dute musika.

Egunean bertan egingo dio gorazarre Toberak zaindariari. Euskal Herriko Musika eskolen Elkarteko bazkide da Tobera; elkarteak antolatutako 'Musikalean' ekimenean sartu dute astearteko ekintza egitaraua. 18:15ean Zegamako plazatik irtengo da musika eskolako trikitiko, panderoko eta perkusioko ikasleek osatutako desfilea kalejiran, eta eskolako gimnasiora arteko bidea egingo dute. Hamelingo txistulariak nola, hala erakarriko dituzte ikasleek musikazaleak gimnasiora. Izan ere, 18:30ean, musika-jai nagusia hasiko da bertan. Bi ordu inguruko kontzertuan, 19 pieza joko dituzte 100 ikaslek eta irakaslek. 30 dantza-ikaslek emango diote hasiera emanaldiari, txistulariekin batera 3 dantza eskainita. 4 piano-jotzaile bakarlariren txanda izango da gero, eta 20 gitarra-jo-tzailek folk eta rock doinuak nahiz Itoizen eta Xabier Leterenak joko dituzte segidan. Amaiera, berriz, 25 perkusio eta trikiti ikaslek emango diote saioari.

Azken urte luzeotako harrerarik onena du Toberaren 2016/2017 ikasturteak herritarren artean: 150 ikaslek baino gehiagok 250 matrikulatik gora egin dituzte. 30. ikasturtea du aurtengoa Musika-eskolak. Hain zuzen ere, eskolaren sortzaileetakoa izandako Jabier Otaegi zenaren herri-omenaldian izango da partaide musika-eskola gaur Zegaman.

Recibe nuestras newsletters en tu email

Apúntate