Diario Vasco

Ataungo umeek Joxemiel Barandiaran gogoan dute

Barandiaran museoan buru belarri lanean aritu dira Ataungo ikasleak.
Barandiaran museoan buru belarri lanean aritu dira Ataungo ikasleak.

Ataungo eskolako 240 ikaslek hartu dute parte Barandiaran Museoak Joxemiel Barandiarani egin nahi izan dion omenaldian. Aurten, 25 bete dira Ataungo gizon jakintsua hil zela eta horregatik inoiz baino gehiago gogoan izan nahi dute bera eta berak egindako lan guztia. Horretarako ekintza desberdinak antolatu dira beti ere, mitologia, arkeologia eta etnografia ardatz hartuz.

HHko ikasleak Joxemiel mundu mitologikoaren inguruan lanean aritu dira. LH 1. ziklokoek Barandiaranek arkeologia eta istoriaurreko gizakiaren inguruan egindako ikerketa garrantzitsuak landu dituzte (bizi-ohiturak, lekuak, hilobiratzeak...). LH 2.ziklokoek bizitza pertsonala. Umiltasunez betetako pertsona izan zen, azkarra, zazpi hizkuntzen jakitun, aurrerakoia oso, teknologiazalea... LH 3. ziklokoek Barandiaranek liburuetan bildutako galtzear zeuden euskaldunon ohitura zaharrak (eguzkilorea, tximistaren aurkako aizkora...) landu dituzte.

Ikasleak aste honetan zehar Barandiaran museora hurbildu dira eta bisita edo tailer baten harira ekin-tza desberdinak burutu dituzte. Horien artean museoaren beheko solairuan instalatu den sagarrondoan, eskolatik idatziak ekarri dituzten sagarrak zintzilikatuko dituzte, sagarrondoa fruituz betez. Bestalde, Imanol Urbietak Barandiarani eskainitako abesti bat ikasi eta abestu dute ikasleek.

Gaztetxoak izan dira omenaldiaren protagonistak eta izango dira. Igandean, Barandiaranek jasotako mito eta ipuin zaharren ipuin kontaketa egingo da museoan bertan Maitane Aizpuru ataundarraren eskutik. Etsai pertsonaia ere bertan izango da. Haurrei zuzendutako saioa izango da, goizeko 11:00etan hasiko dena eta hiru ordu laureneko iraupena izango duena. Aurrez erreserba egitea nahitaezkoa izango da. Prezioa 2,5 eurokoa izango da pertsona bakoitzeko.

Recibe nuestras newsletters en tu email

Apúntate