Diario Vasco

«Eguraldia bikaina izan zen korrikarako eta disfrutatu nuen»

Eneko Agirrezabal igandean Donostiako helmugan.
Eneko Agirrezabal igandean Donostiako helmugan. / PELLO AGIRREZABAL
  • Eneko Agirrezabal segurarra, lehen gipuzkoarra Behobia-Donostian

  • Zazpigarrena izan zen sailkapen nagusian 1:03:20 denborarekin

Eneko Agirrezabal herritar korrikalariak lasterketa bikaina egin zuen igandean Behobia-Donostian. Gaztetxotan proba hiru aldiz eginda bazuen ere, aurtengoa zuen lehiatzera irteten zen aurrenekoa eta, 1:03:20 denborarekin, zazpigarren postuan sailkatu zen.

Horrela, lehen gipuzkoarrari eskaintzen zaion Diego Garcia saria eskuratu zuen eta euskaldunen artean ere bigarrena izan zen, Pierre Urruty baionarraren atzetik.

Protagonistak adierazi digunez, berak aurreikusten zituen denboretan ibili zen igandeko lasterketan: «Entrenamenduetan sentitzen nintzen moduan bete nituen kilometroak hasieratik. Aurreko egunetan katarroarekin ibili nintzen eta beldurra nuen, baina haizerik gabe eta euria ere gutxi, eguraldia bikaina izan zen igandean korrikarako eta asko disfrutatu nuen. Miracruzeko igoeran atzeratu nintzen pixkat nindoan taldetxotik, baina azken metroetan harrapatu nituen berriro eta lehen gipuzkoarra izateko helburua lortu nuen».

Denboraldi hasiera bikaina

Hasi berria den denboraldian, garaipena lortu zuen Agirrezabalek Lasarte-Oriako herri krosean eta Donostiako hondartzetakoan hirugarren sailkatu zen. Orain Gipuzkoako edo Euskadiko Kros Txapelketa egingo du eta apirilean Berlingo maratoi erdia. Eneko Agirrezabalen arabera, «maratoi erdietan ongi moldatzen naizela ari naiz ikusten eta geroz eta gehiago egingo ditudala uste dut. Azken urteetan 1.500 metroko proban murgildu naiz batez ere. Marka ona nuen distantzia horretan, baina iaz ezin izan nuen hobetu eta entrenamenduak aldatzea erabaki dut. Abiadura gutxiago landuaz, distantzia luzeagoak egingo ditut».

Recibe nuestras newsletters en tu email

Apúntate