Diario Vasco

Batxilergoko ikasleak, MUren Goierri campuseko Zientziaren Astean

Goierri campusean elkartutako ikasleak scalextricarekin jolasten aritu ziren.
Goierri campusean elkartutako ikasleak scalextricarekin jolasten aritu ziren. / DV
  • Ikasleek hainbat lantegitan parte hartzeko aukera dute eta bertan oinarrizko ezagutza teorikoak ematen zaizkie, gero praktikan jarri ahal izateko

Mondragon Unibertsitatearen Goierri campusean Zientziaren Astea ospatzen ari dira egun hauetan. Ekimena batxilergo teknologikoko ikasleei zuzentzen zaie, gazteak ezagutza zientifikoetara eta teknikoetara gerturatzeko asmoz. Edizio honetan, Tolosako Laskorain ikastolako eta Urretxu-Zumarraga ikastolako ikasleek hartu dute parte, Goierri Eskolakoez gain.

Ikasleek hainbat lantegitan parte hartzeko aukera dute eta bertan oinarrizko ezagutza teorikoak ematen zaizkie, gero praktikan jarri ahal izateko. Goierri campusean hiru tailer antolatu dira. Gazteek scalextric-arekin jolasten dute. Baina agintea edo mandoa hartu aurretik, motorraren funtzionamenduaren inguruko ezaugarriak, korronte alternoko eta zuzeneko makinen arteko ezberdintasuna, edota motorraren frekuentzia aldatzearen konplexutasuna azaltzen zaizkie.

Praktikoagoa da oraindik zubi egiturak eraikitzen ikasten duten tailerra, kargen aplikazioak eragiten dituen deformazioak aztertuz.

Eta scalextricarekin jolasteaz eta pisu propioa jasaten duten egiturak altxatzen saiatzeaz gain, ikasleek fabrikazio aditiboa edo 3D inpresioa gertutik ezagutzeko pagotxa dute inpresio prozesuak dituen urrats guztiak ikusiz.

Zientziaren Astea Mondragon Unibertsitatearen ekimena da eta etorkizuneko ikasleak zientzia eta teknologiara gerturatzea da helburua eta batez ere, modu didaktikoan eta dibertigarrian zientziarekiko zaletasuna sustatzea.

Recibe nuestras newsletters en tu email

Apúntate