Diario Vasco

Intxurreko kadete neskek garaipen biribila lortu dute Oriokoren aurka

Intxurreko kadeteen lehen mailako nesken taldea sailkapeneko goiko postuetan kokatu da Oriokoren aurka lorturiko garaipenaren ostean. Sara Agirrek eta Maddi Uriak zuzentzen duen taldeak 6 eta 0 irabazi zuen oriotarren aurkako partida eta sailkapeneko hirugarren postuan jarri dira hamar punturekin. Asteburuko neurketa etxean jokatuko dute: euren atzetik puntu bat gutxiagorekin dagoen Zarautz izango dute bisitari. Maila bereko mutilek Idiazabalen aurka jokatu behar zuten partida bertan behera geratu zen eta Lazkaoren zelaian jokatuko dute hurrengo jardunaldian.

Gorengoen mailako taldeak puntuen zakua gizendu ezinik jarraitzen du. Bergararen aurka 4 eta 0 galdu zuten asteburuan eta sailkapeneko hamaseigarren lekuan jarraitzen dute lau punturekin. Datorren jardunaldian hamabosgarren dagoen Ikasberriren aurkako lehia izango dute etxean. Lehen mailako jubenilei dagokienean, bana berdindu zuten Beasainen aurka. Beñat Hierro eta Mikel Lejardiren taldea sailkapeneko bosgarrena da hamaika punturekin eta azkena dagoen Segura Goierriren zelaian jokatuko dute asteburuan.

Azkenik, infantilen mailan, Aralar Intxurrek atsedena izan zuen iragan jardunaldian eta Tolosaren aurka etxean jokatuz berrekingo diote lehiaketari asteburuan.

Loteria

Datorren asteazkenetik aurrera, Alegiako Jubilatuen elkarteko bazkideek Gabonetako loteria erosteko aukera izango dute; 20 euroko dezimoak izango dira, urtero bezala. Loteria erosi nahi duten bazkideek Jubilatuen elkartera gerturatu beharko dute, goizeko 11:00etatik 12:00etara astelehenetik ostiralera. Azken eguna hilaren 18a izango da.

Kultur egitaraua

Alegiako udazkeneko kultur egitarauaren baitan, hilaren 16an, beste ipuin kontalari baten bisita izango dute egun horretan liburutegira gerturatzen diren haurrek, Ines Bengoarena, hain zuzen ere. Hilak 22an, asteartea, arratsaldeko 18:00etan Loatzo musika eskolaren kalejira eta emanaldia izango dira Plazatik abiatuta.

Recibe nuestras newsletters en tu email

Apúntate