Diario Vasco

Ataungo VII. Mondeju lehiaketa izango da hilaren 13an, igandean

Mondeju beltza izango da protagonista hilaren 13an.
Mondeju beltza izango da protagonista hilaren 13an. / J. MARÍN
  • Jentilbaratza Elkarteak antolatzen duen lehiaketa honetan parte hartu nahi dutenek izena hilaren 9a baino lehen eman behar dute

Azaroaren 13an, hau da datorren igandea, izango da Ataungo VII. Mondeju lehiaketa, San Martin Jaien barnean. Ekitaldia eguerdiko 12:30ean hasiko da eta Ataungo edozein herritarrek parte har dezake.

Mondejua beltza egiten da Ataunen eta betidanik horrela ezagutu da. Belaunaldiz belaunaldi gaurdaino iraun duen bizimodu baten adierazgarri izan da eta artzantza eta baserria izan ditu bere kabi. Garaiak aldatu egin dira ordea eta janari honen elaborazioa erakutsi, suspertu eta zabaldu nahian, antolatzen du lehiaketa hau Jentilbaratza Elkarteak.

«Transmisioaren garrantzia funtsezkoa izanik, gaztedia eta baserri girokoa ez den jendea ere tradiziozko langintza hau ikastera eta gerturatzea derrigorrezkoa dugu gorde nahi badugu», diote elkarteko kideek. «Horregatik gonbidatu eta animatu nahi dugu jendea parte hartzera lehiaketa honetan izan ere ia oso herri gutxi dira eusten diotenek usadio honi».

Arauak

Jentilbaratza Elkartetik gogoratzen dute izena azaroaren 9rako eman behar dela 649.01.12.92 (J.R. Munduate) edo 686.89.25.07 (D. Etxeberria) telefonora deituz. Parte har-tzaileei, 35 euro emango zaie ardia erosteko eta osagaiak lortzeko.

Aurkezpenak egiteko ere zenbait pauso errespetatu behar dira. Mondejuak, beren saldarekin, azaroaren 13an goizeko 11:00etarako eraman behar dira plaza Berriko karpara. «Lau kana ekarri beharko dira. Antolatzaileek, ekartzen dituzten kazuelei, zenbaki bana emango diete, epai mahaikideek mondeju egileen izena ez jakiteko», diote.

Lehiaketa

Epaimahaia 12:30ean hasiko da puntuatzen. Lehiaketan aurkezten diren mondejuen puntuaziorako, honako irizpideak hartuko dira kontuan: usaina, zaporea, ebaketa eta nahasketako osagaien txikitze-tamaina. Epaimahaia jatetxeetako sukaldariak eta adituak diren herritarrek osatuko dute. Hauek izango dira sariak: 150 euro eta oroigarria irabazlearentzat, 120 bigarrenaren- tzat eta 100 hirugarrenarentzat.

Recibe nuestras newsletters en tu email

Apúntate