Diario Vasco

Herri txikiek etorkizuna irudikatuko dute

Esperientzia desberdinak partekatuko dituzte, ikuspegi teorikotik zein praktikotik.
Esperientzia desberdinak partekatuko dituzte, ikuspegi teorikotik zein praktikotik. / LOBO ALTUNA
  • Landa eremuko herri txikien etorkizunari buruzko nazioarteko biltzar bat egingo da azaroaren 17tik 19ra

ZerainLab esperimentazio guneak eta Eusko Ikaskuntzak Etorkizuneko Herri Txikiak nazioarteko biltzarra antolatu dute Zerain udalerri gipuzkoarrean azaroaren 17tik 19ra bitartean. Landa eremuko herri txikien garapenaz, ezaugarri bereziez eta etorkizunaz hausnartuko da bertan, eta herri txikien komunitate harremanak, ingurunearekiko harreman iraunkorrak eta ekonomia garapenerako eredu berritzaileak aztertuko dira.

Biltzarrak Europako eredu erreferenteak nahiz Euskal Herri mailako esperientzia anitzak jasoko ditu, ahalik eta kopuru zabalenean, eta horretarako, alderdi teorikoak nahiz praxiak jorratuko dira. Modulu teorikoan, komunitate bizitzaren sustrai bereziak eta etorkizuneko erronkak izango dira eztabaidagai, bai eta landa garapenerako eredu berriak ere. Modulu praktikoan, aldiz, herrigintzan lanean ari diren hainbat ekimenen berri emango da, elkar ezagutu eta etorkizunean balizko aliantzak sortu daitezen.

Azkenik, antolatzaileek etorkizuna irudikatzeko talde dinamika proposatuko dute. Bertan, «herri txikientzat zer etorkizuna nahiko genukeen» adieraziko dute, «eszenatoki desiragarri horretara iristeko eman beharreko urratsak identifikatzen ditugun bitartean». Topaketaren amaieran, eta lortutako ondorioen baitan, Zeraingo Adierazpena idatzi eta gizarteratuko da.

Eusko Ikaskuntzak eta ZerainLab esperimentazio guneak antolaturiko biltzarreko izen ematea doakoa izango da, tokia bete arte (izena ematea derrigorrezkoa izango da). Euskaraz, gaztelaniaz eta ingelesez izango da topaketa, eta aldi bereko itzulpena zerbitzua eskainiko da.

Biltzarraren Batzorde Zientifikoa bost lagunek osatuko dute: Izaskun Abril Nafarroako Gobernuko Landa Garapeneko gabinete buruak, Elixabete Garmendia kazetari eta ZerainLab elkarteko sustatzaileak, Jean Michel Larrasquet Eusko Ikaskuntzako Etorkizuna Irudikatu lantaldeko arduradun zientifikoak, Jon Muñoa ZerainLabeko sustatzaile eta Deustuko unibertsitateko irakasleak eta Luis Mari Zaldua Gipuzkoako Foru Aldundiko tekniko eta Gipuzkoako Parketxe Sarea Fundazioko zuzendariak.

Temas

Recibe nuestras newsletters en tu email

Apúntate