Diario Vasco

Gomazko paletako partidak gaur arratsean Elorri pilotalekuan

Gero eta jardunaldi gutxiago geratzen dira Gipuzkoako pilota txapelketako lehen ligaxkak amaitzeko eta Intxurrek lehian dituen bikoteetatik askok dute aurrera egiteko aukera. Eskuz binaka, kadeteen hirugarren mailako bikotea multzoko lehen postuan da sendo. Nagusietan, lehen eta hirugarren mailako lau bikote dira lehian eta laurek dituzte sailkatzeko aukerak.

Gainean dugun jardunaldiari begira, gomazko paletan diharduten nesken jubenilen bigarren mailako partidak jokatuko dira gaur 19:00etan Alegiako Elorri pilotalekuan. Berriz ere Intxurreko bi bikote izango dira nor baino nor: Zhang eta Agirre Aramendi eta Esnaolaren aurka lehiatuko dira. Maila bereko beste bikoteak Ataunen aurka jokatuko du jaialdiko bigarren partida eta ondoren alebinen mailako eskuz banakako hiru neurketa jokatuko dira: partida horietan Ander Iturrioz, Jon Zabala eta Joseba Rojas izango dira Intxurreko ordezkariak.

Gomazko paletan diharduten nesketara itzuliz, gogora dezagun joan den jardunaldian jubenilen lehen mailan Intxurrekoen arteko derbia izan genuela ligaxkari hasiera emateko. Olanok eta Agirrek 30 eta 19 irabazi zuten Bachen eta Ontsaloren aurka. Bigarren mailan ere Intxurreko bi bikote aritu ziren elkarren aurka eta Aramendik eta Esnaolak 30 eta 9 irabazi zieten Karrerari eta Belokiri. Multzo bereko beste bikoteak atsedena izan zuen. Lehen bi jardunaldiak jokatuta, sailkapeneko goiko postuetan dira hiru bikoteak.

Argazki Rallyko sariak

Alegiako Argazkizaleen Taldeak gogorarazi du gaur, ostiralarekin banatuko direla Elizpe zinean irailaren 25ean egin zen I. Argazki Rallyko sariak. Hamalau lagunek hartu zuten parte argazki rallyan. Kategoria bakoitzean hiru sari banatuko dira: bilduma onenari, argazki onenari eta alegiar baten argazki onenari. Sari-banaketa ekitaldia iluntzeko 20:00etan izango da, eta Alegiako Argazkizaleen Taldetik azpimarratu dute, rallyaren oinarrietan argi azaltzen den moduan, saria jasotzeko ezinbestekoa izango dela saridunak edo haien ordezkariak bertan egotea.

Recibe nuestras newsletters en tu email

Apúntate