Diario Vasco

Azaroaren 2tik 12ra ospatuko da Amezketako Kultur Astea

Hamaika egunez luzatuko den Kultur Astea antolatu du Amezketako Udalak. Herritarrek egun horietan guztietan izango dute zer ikusi edo entzuna: txiki zein heldu, kulturzale zein kirolzale, den-denek aurkituko dute aurtengo egitarauan euren neurri-neurrirako zerbait, seguru.

Domu Santu egunaren biharamunean izango da lehenengo hitzordua 'Eta hik zer?' antzerki-forumarekin, eta hilaren 3an Joxe Mari Oterminek 'Amezketa eta kirola' bere liburu berria aurkeztuko du. Ierebizkar errotara bisita eta DBHko 4. mailako ikasleen aldeko talo jatea dakartza azaroaren 4ak eta II. Ergoneko Festa, hilaren 5ak. Lehenengo astea amaitzeko, azaroaren 6an, igandearekin, garai bateko baserritarren erara dotore jantzi eta 'perira' joango dira amezketarrak.

Bigarren astea Maite Gurrutxaga ilustratzaile duen 'Martin' album ilustratuari buruzko solasaldiarekin hasiko da astelehenean eta astearterako 'Euskal selekzioa, gure esku al dago?' prestatu du Txumaik. Asteazkenean Garikoitz Zubillagak 'Nepal nire begietatik' hitzaldia eskainiko du eta ostegunean Mertxe Urteaga izango da protagonista: Arritzagan lanean aritu ziren meatzariek utzitako arrastoaren inguruan ariko da. Hilaren 11rako, San Martin Egunerako, goizez zein arratsaldez luzatuko den egitaraua prestatu dute txiki eta helduentzat. Eta azaroaren 12an, larunbatarekin, Gure Esku Dagok antolatuta Zerbeza Perie egingo da.

Recibe nuestras newsletters en tu email

Apúntate