Diario Vasco

Sagar festa ederra Kultur Astea hasteko

Sagardoa nola egiten zen erakutsi zuten plazan, eta muztioa ere egin zen, gero bertaratutakoen artean banatu zena. Irrintzi Alaiko dantzariek girotu zuten ekitaldia.
Sagardoa nola egiten zen erakutsi zuten plazan, eta muztioa ere egin zen, gero bertaratutakoen artean banatu zena. Irrintzi Alaiko dantzariek girotu zuten ekitaldia. / NÚÑEZ
  • Bostehun kilo sagar inguru bildu eta erdia baino gehiago erabili zuten muztioa egiteko

Sagar egunarekin eman zitzaion hasiera atzo aurtengo kultur asteari. Txupinazoa bota ondoren Guadalupeko ermitatik atera ziren herritarrak. Kalejiran joan ziren plazaraino txistulariek lagunduta eta bertan Irrintzi alai taldeko dantzariek Agurra eskaini zieten. Jarraian, sagardoa nola egiten den erakutsi zuten bertan elkartu ziren herritarrei. Lehenengo sagarra zanpatu zuten tolera bota aurretik. Bertan, prentsatu zuten sagarra Gabinok, Jose Marik, Jose Manuelek eta Jose Ignaziok, festaren antolatzaileak, herriko haurren laguntzarekin.

Bostehun kilo sagar inguru bildu zituzten eta erdia baino gehiago erabili zuten muztioa egiteko. Berrogeita hamar litrotik gora muztio egin zituzten, bertaratuen artean banatu zirenak.

Aldi berean, frontoian sagar mota ezberdinen erakusketa antolatu zen, reineta grisa eta txuria, Elstar, jubilé, zabale, reina de reinetas, eta abar barietateko sagarrekin. Jaiari amaiera emateko sagarrarekin egindako produktuen azoka egon zen. Hainbat tarta, postre, gozo, marmelada, eta abarrekin.

Gaur bertsolariak

Gaur goizean Andoni Egaña eta Alaia Martin bertsolariak kantari arituko dira Jainkoeneako terrazan. Taberna eguerditik aurrera egongo da irekita salda, mondeju eta haragi egosia eskaintzeko.

Bihar astelehenean, 16:30ean jubilatuentzako pote, igel eta toka txapelketa antolatuko da. Ondoren, 19:30ean argindar faktura ulertzeko hitzaldia eta tailerra eskainiko du Goiener kooperatibak udaletxeko batzar aretoan. Norberaren faktura eraman ahal izango da kontsulta egiteko. Era berean, 17:00etan, matematika-argazkiei buruzko erakusketa irekiko da Patxi Ezkiaga kultur etxean Lemniskata elkartearen eskutik.

Recibe nuestras newsletters en tu email

Apúntate