Diario Vasco

Dantza solteko txapelketan 10 bikote arituko dira gaur

Euskal Herriko Dan-tza Solteko 40. txapelketa jokatuko da gaur Baratze pilotalekuan. 18:00etan hasiko den lehiaketan 10 bikotek parte hartuko dute, horietatik 8 gipuzkoarrak izango direlarik, bikote bat Arabakoa eta beste bat Lapurdikoa. Iazko bikote irabazlea, Iker Sanz eta Lierni Kamio, ez da izango oholtza gainean. Iker Sanzek parte hartuko du, baina Ane Urrozolarekin.

Beste bikoteak hauek izango dira: Gorka Kerejeta eta Leire Eizmendi (Azpeitia-Errezil). Amets Amubieta eta Larraitz Larrañaga (Azpeitia). Xabier Artola eta Idoia Besada (Irura-Pasaia). Ibai Jimenez eta Iratxe Lizarburu ( Zaldibia-Ibarra). Pierre Latasa eta Ihintza Handy (Ziburu). Julen Murgiondo eta Saioa Galarraga (Bergara). Mikel Subinas eta Maite Beobide (Azpeitia). Beñat Olano eta Paula Gonzalez (Gasteiz) eta Julen Berrondo eta Nagore Berrondo (Errezil). Epaileei dagokionez, Josu Ibarra, Arantxa Garin, Rafa Salaberria, Nahikari Vizuete eta Jesus Mari Garatek osatuko dute epaimahaia.

Fandangoa eta arin-arina dan-tzatu beharko dituzte, txistuaren eta trikitixaren doinuarekin. Isilkada taldeko txistulariek joko dute fandangoa eta Estanga anaiek arin-arina. Txistularien artean, txapelketaren 40 urte hauetan dantzariei musika jarri dieten Joxe Mari Telleria herritarra eta Naxario Telleria idiazabaldarra omenduko dira gaurko saioan. Dantzarien jantziak ere sarituko dira eta, atsedenaldian, epaimahaiak irabazleak izendatu bitartean, Edu Muruamendiarazen Aukeran dantza konpainiak 'Geltokia Suit' ikuskizuna eskainiko du. Dantza saioa ETB-n ikusi ahalko da gauean, 21:00etatik aurrera.

Recibe nuestras newsletters en tu email

Apúntate