Diario Vasco
Palentziako Castilla Vieja abesbatzak zazpi kantuz osatutako egitaraua prestatu du biharko kontzerturako.
Palentziako Castilla Vieja abesbatzak zazpi kantuz osatutako egitaraua prestatu du biharko kontzerturako. / TXINTXARRI ABESBATZA

Txintxarri Eguna ospatuko dute bihar herriko abesbatzek

  • Palentziako Dueñas herriko Castilla Vieja abesbatzaren bisita jasoko dute aurten

Alegiako Txintxarri eta Txintxarri Txiki abesbatzek Txintxarri Eguna ospatuko dute bihar, larunbatarekin. Aurtengo abesbatzen eguna nobedade batekin dator, gainera, herriko abesbatzekin batera Palentziako Dueñas herriko Castilla Vieja abesbatza kantuan ariko da baita iluntzeko 19:45etan Juan Bataiatzailea Deunaren elizan eskainiko duten kontzertuan.

Ohi bezala, Txintxarri Txiki abesbatzak emango dio hasiera emanaldiari, eta Garbiñe Orbegozoren zuzendaritzapean hiru kantu eskainiko dituzte, horien artean, Erlak bikoteak 60ko hamarkadan ezagun egin zuen 'Harritxo bat bota nion'. Mariaje Rekondo izango dute lagun pianoan.

Jarraian, Txintxarri abesbatzak bost abestiz osaturiko saioa eskainiko du, Garbiñe Orbegozoren aginduetara horiek ere. Françoise Hardy abeslari frantziarraren 'Tous les garçons et les filles' kantu ezagunaz gozatzeko aukera izango dute entzuleek, besteak beste.

Amaiera, elkarrekin

Alegiarren ondoren, gaztelarrak aterako dira agertokira. 1995ean sortutako abesbatza da Castilla Vieja, eta 40 lagunek osatzen dute. Gaur egun Jose Maria Gomez da abestaldeko zuzendaria eta Espainian zehar hainbat lehiaketa eta topaketetan parte hartu izan dute. Gaztelarrek zazpi abestiz osatutako emanaldia prestatu dute biharko: horien artean dira, 'La mozuela de los camasobres' Palentziako doinu herrikoia eta Ibon Casas musikari donostiarraren 'Apaga la luz y verás'.

Biharko kontzertuari elkarrekin emango diote amaiera Txintxarri eta Castilla Vieja abesbatzek Haendelen 'Canticorum iubilo' eta Agur jaunak' abestuz.

Palentziako abesbatza Alegiara etorri den bezalaxe, alegiarrak etorkizun hurbilean Dueñasera joango direla iragarri dute Txintxarri abesbatzatik.

Recibe nuestras newsletters en tu email

Apúntate