Diario Vasco

Egutegirako argazki lehiaketa antolatu du berriz ere Anoetako Udalak

Azken urteetan ohitura den bezala, herriko argazkiekin osatuko du 2017. urteko egutegia Anoetako Udalak. Aurtengo gaia 'Gure animaliak' izango da eta parte hartzeko epea hilabete amaierara arte egongo da irekita interesa duten guztientzat.

Gehienez hiru argazki

Lehiaketa honetan Anoetan erroldatuta dagoen edozein pertsonak parte hartu dezake, bakarka edo taldeka, eta gehienez hiru argazki aurkeztu daitezke.

Guztiak horizontalak izan beharko dira nahi eta nahi ez eta paperean zein digitalean eman beharko dira. Paperekoak 13x18 zm edo an-tzeko neurria izan beharko dute eta formatu digitalean 3.000 x 2.000 pixeleko tamaina.

Kasu honetan, CD disko batean, pendrive batean euskara zerbitzura eramanda, edo euskara@anoeta.eus helbide elektronikora bidali daitezke. Argazkiekin batera gutun-azal berean egilearen izen-abizenak, kontakturako telefono zenbakia, helbide elektronikoa, argazkiak non atera diren eta bakoitzari dagokion esaera zaharra, hitz-joko edota errimatxo bat ere agertu beharko dira baita ere.

Sariak

Anoetako Udalak zortzi argazki sarituko ditu, egutegian aterako direnak, eta bakoitzak 50 euroko saria edukiko du.

Udalak izango du azken hitza sarituko diren argazkiei dagokienean, eta lehiaketara aurkeztutako argazki guztiak erabili ahal izango ditu egoki deritzan gauzetarako.

Aurkeztutako argazkiekin erakusketa bat egingo da azaroaren 7tik 20ra Abraham Olano Kiroldegian eta herriko udalaren webgunean, hau da, www.anoeta.eus.

Recibe nuestras newsletters en tu email

Apúntate