Diario Vasco

Euskal jai jendetsua Anoetan

Herriko baserritarrek baraziak saldu zituzten.
Herriko baserritarrek baraziak saldu zituzten.

Bederatzigarren urtez ospatu zen Anoetan Euskal jaia. Plaza ingurua herritarrez eta bisitariez bete zen egunaz gozatzeko. Herriko txistularien kalejirak iragarri zuen jaia goizean goiz eta ondoren goiz guztian dultzaineroak eta Donibaneko joaldunak herrian zehar ibili ziren. Hogei postutik gora erakutsi zituzten nekazaritza eta artisautza produktuak: ogiak eta gozoak, txerrikiak, sendabelarrak eta ukenduak, pilotak, egurrezko tailak, larruzko poltsak, baita herriko Sarobe, Argindegi, Barrundi eta Etxeberri baserrietako barazkiak eta fruituak ere. Era berean, herriko eragileek ere postua izan zuten, besteak beste, Anitz Dantza Taldeak eta ikastolako ikasleek.

Aurtengo gaia sendabelarrak eta mitologia izan zen eta Sara Letamendia goiz guztian aritu zen jendaurrean ukenduak nola egiten dituen erakusten. Gainera, haurrentzako mitologia tailerra izan zen. Frontoi ondoko plazan, berriz, abereak gertutik ikusteko aukera izan zuten haurrek. Ederki pasa zuten ardiak, ahuntzak, astoak, antzarrak eta zaldiak ikusten eta ausartenak zaldian ibiltzeko aukera ere izan zuten. Eguerdian, jaiaren aurkezpena egin ondoren, Ataungo taldeak Tartalo eta san Martin Txiki pertsonaiaren inguruko pasadizoa antzeztu zuten, nola san Martin txikik gari aleak lapurtu zizkion jentilari eta nola ikasi zuen ereiten. Azokari amaiera emateko, ardo dastaketa izan zen eta Kukuak kantuz taldeak kantu jira egin zuen herrian zehar.

Arratsaldean, berriz, Aiko taldearekin dantzaldia izan zen plazan eta iluntzean Ingo al deu? taldearekin erromeriak eman zion amaiera jaiari.Euskal jaiaren hasiera, hala ere, bezperan ospatu zen. Mari, sorginak eta jentilak Isasti menditik jaitsi ziren eta suaren inguruan dantzatu zuten plazan.

Recibe nuestras newsletters en tu email

Apúntate