Diario Vasco
Uzturpe ikastolako ikasleek Molpoido auzoan bildu zituzten piparrak.
Uzturpe ikastolako ikasleek Molpoido auzoan bildu zituzten piparrak. / ARANDIA

Ibarrako piparra, lurretik potera

  • Uzturpe Ikastolako DBH 3ko ikasleek maiatzean landatu zituzten piparrak eta atzo jaso zuten uzta berdea, Molpoido auzoan

Guztira, 27 ikaslek hartu zuten parte urteroko egitasmoan. Duela hiru urtetik, bai Uzturpe Ikastolak eta bai Ibarra piparra 789 taldeak antolatzen duten egitasmoa da Ibarrako ikurra ikasleen artean oraindik ere ezagunago egiteko. Programak DBH3ko ikasleek maiatza erdialdean landatutako piparrak jaso eta potetan biltzea du helburu. Hori guztia egin ondoren, hamaiketakoa eginda joan ziren etxera.

«Ibarrako piparrari buruz zertxobait gehiago dakigu orain; esate baterako, Ameriketatik etorri zela, lurraldearen arabera piper ezberdina ateratzen dela eta Ibarrakoa beste lekutakoak baino berdeagoa dugula», azaldu zuten Ainhoa Peña eta Eneko Barriola ikasleek.

Pipar bilketa prozesuan, 789ko Joselu Lopetegik argitu zien Ibarrako piparrari ez zaiola heltzen, gorritzen uzten, eta ozpinetarako, komeni zela pipar oso txikiak ez biltzea.

Ikur berdearen hazitegia

«Piparrak duen gauzarik onena da lurrak berezko dituen ezaugarrietara, klima orotara moldatzen dela beti». Hala zioen Ibarra piparra 789 taldeko Ander Lizasok. «Gure herria piparraren hazitegia izan da Ameriketatik ekarri zutenetik; ondoren, Nafarro aldera saltzen hasi zen, baina XIX. mendera arte, hemengo jendeak ez zuen kontsumitzen». Orduan, 'gilda' erara hartzen zuten, hots, ozpinetan. 90eko hamarkadaren inguruan, ordea, Ibarrako piparrak arrakasta lortu zuen frijitze teknikarekin. Lizasok gehitu zuen 789 taldeak baduela etorkizuneko proiekturik: «Bi helburu nagusi ditugu, piparra herriratzea, eta munduratzea. Herriratzeko, azoketan hartzen dugu parte, baita honelako programetan ere; munduratzeko, gure ikurrari buruz biltzen duen informazio guztia liburu batera ekarri nahi dugu, hori da gure apustua».

Recibe nuestras newsletters en tu email

Apúntate