Diario Vasco

Euskal jaia izango da igande honetan Anoetan

Urriko bigarren igandean Euskal jaiaren bederatzigarren edizioa ospatuko da Anoetan. Ekitaldiak larunbat arratsaldean hasiko dira Mariren jaitsierarekin. Jentilekin eta sorginekin batera Isasti menditik jaitsiko dira 20:30ean plazaraino eta bertan suaren inguruan dantzatuko dute. Igandean, eskualdeko baserritar eta artisauen azoka egongo da plazan. Goizean goiz herriko txistulariek kalejira egingo dute eta 10:00etan hasiko da azoka, eguerdira arte. 11:00etan haurrentzako euskal mitologiari buruzko tailerra egingo da eta 12:00etan jaiaren aurkezpen ekitaldia izango da. Ondoren, ataundarrek emanaldia eskainiko dute eta jarraian ardo dastaketa egingo da Kukuak Kantuz taldeak alaitua. Bazkaria frontoian izango da, 14:00etan. Arratsaldean, 18:00etan plazako dantzak egongo dira Aiko taldearen eskutik eta 20:00etan talogileak eta erromeria 'Ingo al deu?' taldearekin.

Bazkarira joan nahi duten guztiek gaur asteazkena dute txartelak erosteko azken eguna herriko taberna guztietan. Bazkariko menua txanpinoiak, betizua burruntzian, jogurta, kafea eta kopa izango da, baina nahi dutenentzako begetarianoa ere egongo da betizua arroza barazkiekin ordezkatuz. Helduentzako txartelaren prezioa 20 euro izango da, langabetuena, ikasleena, jubilatuena eta pentsiodunena 15 euro eta zortzi urtetik beherako haurrentzako 10. Igandean bertan ere egongo da txartelak erosteko aukera, 7 euro garestiago.

Recibe nuestras newsletters en tu email

Apúntate