Diario Vasco

Etxezarreta paper fabrikaren balio arkitektonikoa aitortu dute

Etxezarreta paper fabrika, balio arkitektoniko handikoa
Etxezarreta paper fabrika, balio arkitektoniko handikoa
  • Docomomo erakundearen ekimenez, astelehenean, paper fabrikaren bulego eraikinean plaka bat ezarriko dute

Docomomo nazioarteko erakundeak Etxezarreta paper fabrikaren balio arkitektonikoa errokonozitu berri du. Arkitektura modernoa inbentariatu, dibulgatu eta babesteaz arduratzen den erakundea da Docomomo (Documentation and Conservation of buildings, sites and neighbourhoods of the Modern Movement), 1997an sortua. Bi urtez behin egiten dute kongresua eta aurten, Donostian izango da, IX.a, azaroaren 16tik 18ra. Mugimendu modernoa: kultur ondarea eta gizartea izango da kongresuaren gaia, eta, horren harira, Gipuzkoan zenbait ekitaldi egingo dituzte.

Hain zuzen, astelehenean, Etxezarreta paper fabrikaren bulego eraikinean plaka bat ezarriko dute, eguerdiko 12etan, haren balio arkitektonikoari errekonozimendua egiteko. Fernando Redon arkitekto nafarrarena da eraikina.

Ondoren, udaletxeko areto nagusian, Irati Otamendi arkitektoak eraikinaren inguruko aurkezpena egingo du, haren historia eta ezaugarriak azaltzeko. Otamendik Etxezarreta paper fabrikaren inguruan egin zuen arkitektura ikasketen masterra, eta, gaur egun, Gipuzkoako Oria ibaiaren arroko ondare industriala aztertzen ari da bere doktore tesian.

Bertan izango dira Euskal Herriko Arkitektoen Elkargo Ofizialeko presidente Judith Ubarrechena eta Gipuzkoako Foru Aldundiko Lurralde Antolamenduko zuzendari Miguel Angel Crespo.

Ekitaldia irekia izango da, eta herritar guztiok zaudete gonbidatuta.

Recibe nuestras newsletters en tu email

Apúntate