Diario Vasco

Ikasturte honetako ikastaroak hastear daude Alkizan

Aiztondo zerbitzuen mankomunitateak eta Alkizako Udalak antolatutako ikastaroak hastear daude. Urritik ekainera bitartean emango dira eta 15 euroko prezioa izango dute lehen seme-alabarentzat eta 12 eurokoa bigarrenarentzat. Astelehenetan hip-hop ikastaroa emango da, astearteetan antzerkia, asteazkenetan eskulanak, ostegunetan akrobaziak, talde kirolak eta skate-patinak, eta ostiraletan pilota. HH5etik LH6ra bitarteko ikasleei zuzenduta daude eta adinaren arabera bi taldetan banatuko da bakoitza, pilota izan ezik.

Asteburuetan ere ikastaroak egiteko aukera egongo da. Larunbatetan idazkera digitaleko tailerra egongo da LH3tik gorako haurrentzat, 13 urtetik gorakoek ere izen eman dezakete. Ikastaro hau urritik maiatzera emango da eta 25 euroko prezioa izango du, nahiz eta hasierako kuotari 20 euro erantsi beharko zaion ikasturteko materialarentzako.

Hiru eta sei urte bitarteko haurrentzako musika eta mugimendua izeneko ikastaroa egingo da, 20 euroko prezioarekin, eta zazpi urtetik aurrerakoentzako instrumentuen banakako klaseak egongo dira. Azken honen prezioa kontsultatu egin beharko da.

Recibe nuestras newsletters en tu email

Apúntate