Diario Vasco

Garaipenarekin estreinatu dute denboraldia Intxurreko kadeteen mailako neskek

Jokoan zituzten lau partidetan hiru garaipen eskuratu dituzte Intxurreko futbol taldeek pasa den asteburuan. Kadeteen mailako bi taldeak eta lehen mailako jubenilak izan dira hiru puntuak batzeko gai izan direnak; aldiz, gorengoen mailako taldea esku hutsik itzuli da etxera.

Kadeteen lehen mailako neskek Zarautzen jokatu zuten denboraldiko lehenengo partida eta 0 eta 2 irabazi eta hiru puntuak poltsikoratuta itzuli ziren etxera. Hala, sailkapeneko lehen postuan dira alegiarrak. Datorren jardunaldian Urnietaren bisita izango dute. Maila berean diharduten mutilek, bestalde, denboraldiko bigarren garaipena lortu zuten Lazkaori 3 eta 0 irabazita. Orain arte jokatutako guztia irabazi dute, beraz, eta liderrarekin berdinduta daude sei punturekin.

Lehen mailako jubenilek ere berri onak ekarri dituzte Alegiara. Denboraldiko lehen partida galdu ostean, etxean hiru puntuak lortu nahi zituzten bigarren jardunaldian, eta Segura Goierriri 6 eta 1 irabazita helburua aise lortu zutela esan genezake. Sailkapeneko laugarren postuan daude hiru punturekin. Datorren asteburuan Lazkaoren zelaian jokatuko dute hirugarren jardunaldiko neurketa. Azkenik, gorengoen mailan diharduen Intxurreko taldeak 6 eta 1 galdu zuen Zestoan. Aukerarik gabe izan ziren partida osoan eta lehen jardunaldian lortutako puntuarekin hamabigarren postuan daude. Beraien atzetik punturik gabe dagoen Getariako Ketaren aurka jokatuko dute datorren asteburuan etxean.

Ur kontagailu zaharrak

Gipuzkoako Urakek jakinarazi du bigarren hiruhilekoan egindako irakurketetan aurkitu zituzten kontagailu zahar edo matxuratuak aldatzen hasiko direla aste honetan. Bezeroek ez dute kontagailu berria ordaindu beharrik izango. Edozen argibidetarako eskura dituzte 902302222 eta 943318602 telefono zenbakiak eta www.gipuzkoakour.com atari digitala.