Diario Vasco

Basherri sareko kideek euren proiektua azaldu zuten Bidanian

Joana, Amets eta Maitek Basherri sarea azaldu zuten.
Joana, Amets eta Maitek Basherri sarea azaldu zuten. / NÚÑEZ
  • Gaur, Ander Malbadi eta Ander Dorronsorok Oasis Raid proba solidarioan izandako esperientziak azalduko dituzte

Bidania-Goiazko herritarrek Basherri proiektuaren inguruko solasaldiarekin eman zioten hasiera kultur asteari. Hitzaldira gerturatu ziren herritarren lehen eskutik ezagutu ahal izan zuten Maite, Amets eta Joana Beizamako ekoizle taldeko kideen esperientzia. Bileran parte hartu zuten herritarrak proiektuaren inguruko jakin-mina erakutsi zuten galdera ugari eginez, nahiz eta gehienek zuten baratzea etxe inguruan.

Azaldu zutenez, oraingoz, Irungo kontsumo taldearekin lan egiten badute ere, beste herrietara zabaltzeko asmoa dute beren produktuak kontsumo taldeak zein kooperatibak sortuz. Kontsumo taldeen kideek hileko kuota baten truke astero produktu ekologikoez osatutako saskia jasotzen dute. Kooperatibakoek, sakia jasotzeaz gain harreman zuzenagoa dute ekoizleekin, behar denean lursaila edo saskiak prestatzen lagunduz.

Helburua baserritarren lanari balioa ematea da, lurrarekin harreman zuzenagoa eta elikadura osasuntsuagoa bultzatuz, modu ekologikoan ekoizten baitute.

Urte guztian baratzak kantitate bera ematen ez duen arren, ziurtatu zuten gutxienez zazpi barazki mota izaten direla saski bakoitzean eta produkzio gutxieneko uneetan kantitate gutxiago bada ere, asko dagoenean konpentsatzen dela barazki gehiagorekin. Era berean, barazkiez gain sagardoa eta ogia egiten dute eta arrautzak ere badituzte. Igandean Goiatzen egingo den azokan izango dira beren proiektua azaltzen eta produktuak saltzen.

Gaur Oasis Raid

Ander Malbadi eta Ander Dorronsoro albizturtarrek Oasis Raid proba solidarioan izandako esperientziak eta abenturak azalduko dituzte gaur Kultur Astearen baitan. Hitzaldia Udaletxeko pleno aretoan izango da 21:00etan.

Bihar ostirala, hilaren 23an, joan zen larunbatean antolatu zen argazki lehiaketako parte hartzaileen erakusketa eta sari banaketa egingo da arratsaldeko 19:00etatik aurrera Bidaniko frontoian. Jarraian, edari, pintxo eta postreak izango dira denentzako. Horretarako, antolakuntzak herritarrei animatzen diete etxean prestatutako pintxoak edo postreak eramatera.