Diario Vasco

Parte hartze handia Elduaingo jaietan

Pilota txapelketako irabazleak sariekin.
Pilota txapelketako irabazleak sariekin. / ARGAZKIAK YARZA

Giro ederrean eman zioten Elduainen amaiera Andra Mari jaiei. Igande goizean umeen pala eta pilota partiduak jokatu ziren, banaka zein binakako partiduetan. Palan, binaka, Anek eta Garazik irabazi zuten Nahia eta Nagoreren aurka eta, banaka, Lorena izan zen garaile Juneren aurka. Esku pilotan, Andonik eta Mikelek irabazi zuten Urko eta Oierren aurka eta buruz-buruan, Xabatek irabazi zion Joni.

Ondoren, hamaiketakoa eskaini zen plazan, sardina, txorizoa eta piperminak, txakolinarekin. Herritar ugari hurbildu ziren eta giro ederraren baitan toka txapelketa antolatu zen haur eta helduentzat.

Parte hartzaile bakoitzak bi tirada bota zituen eta, bukaeran, haurren mailan, Urko Egues izan zen garaile, Jon Zeberio bigarren eta Alex Zeberio hirugarren. Helduetan, Arkaitz Aurkia izan zen irabazle orokorra eta lehen herritarra, Ane Gereñok irabazi zuen emakumeetan eta Aritz Nazabalek eraman zuen gazteen saria.

Arratsaldean, Orratx taldeak 'Kale Hop' antzerkia eskaini zuen frontoian eta ondoren Gorritiren animaliekin ederki pasa zuten haur eta gazteek. Txikienak ponien gainean ibiliz eta gazte ausartenak zezentxoen aurrean korrika.