Diario Vasco

'Bisoi europarra gure artean' erakusketa ostegunetik aurrera

Duela gutxi arte, bisoia esatean, berokiak egiteko erabiltzen den animalia zetorkigun burura guztioi, bere larru ederragatik haztegi industrialetan hazitzen den bisoi amerikarra, alegia.

Baina badago beste bisoi bat, bisoi europarra, urte askoan inor ohartu ere egin gabe, gure alboko ibai eta erreketan ezkutuan bizi izan dena. Gaur egun oraindik, gure faunako ugaztunen artean ezezagunenetakoa da, eta, tamalez, ongi ezagutu aurretik betiko desagertzea ere gerta liteke; izan ere, XIX. mendean Europako erdialdetik desagertzen hasi zenetik, bisoi europarra jatorrizko banaketa eremuaren % 80tik desagertu da jada.

Babestuta dago

Europako faunan gaur egun desagertzeko arrisku handiena duenetako bat denez, babestuta dago. Etorkizuna izan dezaketen azken multzoak Europako mendebaldekoak izan daitezke.

Animalia txiki hau oraindik ere Ataunen aurkitzen da, eta berebiziko garrantzia du denok honen berri izatea. Izan ere, animalia txiki honen bizimoduaren eta dituen arriskuen ezagutzaren bidez lortuko baitugu denon artean denbora luzez gure herrian bizirautea.

Honengatik guztiagatik, bisoi europarrari buruzko erakusketa antolatu du Atauniker kultur elkarteak, Orkli, Gipuzkoako Parketxeak, Gipuzkoako Foru Aldundia eta Ataungo Udalaren laguntzaz. Aukeratu diren lanak herriko Antzokiko hall-ean ikusgai izango dira hilaren 15etik, hau da ostegun honetatik, irailaren 23 a arte, 18:30etik 20:00etara. Larunbateko ordutegia hau da: 11:30etik 13:30era; igandean itxita.

Ordutegi bereziak hitzartzeko aukera dago taldeentzat.