Diario Vasco

Josu Eizmendi eta Jon Altuna beteranoen txapelketako irabazle izan ziren Alkizan

Haurrek ederki pasa zuten paraxutarekin.
Haurrek ederki pasa zuten paraxutarekin.

Euriak ez zituen Alkizako jaiak zapuztu atzokoan, nahiz eta egitarauan aldaketak egitera behartu zituen. Goizean haurrentzako apar festa ezin izan zen egin baina ederki pasa zuten beraientzako antolatutako jokoetan. Diaboloarekin, palan zein punteria jolasetan aritu ziren baita paraxutarekin eta painuelitoan.

Arratsaldean, Beteranoen XV. Pelota Txapelketaren finalak jokatu ziren frontoian. Harmailak ikuslez bete ziren bi partiduak ikusteko. Lehenengoan hirugarren eta laugarren postuak jokatu ziren: Aritz San Sebastian eta Jokin Saralegik 22-12 irabazi zuten Igor Gorostidiri eta Julen Sorarraini. Ondoren finala jokatu zen, Josu Eizmendik eta Jon Altunak irabazi zutena 22-18 emaitzarekin Aitor Sorarrain eta Manex Arrietaren aurka. Finaleko jokalari onenaren saria Jon Altunak jaso zuen. Aurten hogeita bost urte bete dira beteranoen txapelketa antolatzen denetik. Urte hartan Miguel Angel Ugartemendiak eta Balduino Alfontsok irabazi zuten Bittor Sorarrain eta Juan Ignazio Gabirondoren aurka 22-18 emaitzarekin, atzo gertatu zen antzera.

Gaurko egitaraua

Haur eta gaztetxoentzako txirrindulari lasterketa antolatuko da gaur 10:30etik aurrera. Arratsaldeko 17:00etan herritarren arteko herri kirol erakustaldia izango da Izaskun Mendizabal eta Jon Zabalaren omenez.

Jarraian, sagardo dastaketa izango da eta Bihozkada taldearen kontzertua. Gaueko 23:00etan aizkolarien eta harri jasotzaileen saioa egingo da frontoian eta ondoren Ingo al deu? taldearekin erromeria.